इलाम १ मा पुनः मतदानको माग गर्दै झलनाथ खनालले दायर गरेको रिट सर्वोच्चद्वारा खारेज

काठमाडौं । इलाम क्षेत्र नम्बर १ बाट प्रतिनिधिसभा सदस्यमा पराजित एकीकृत समाजवादीका सम्मानित नेता झलनाथ खनालले सर्वोच्च अदालतमा दायर रिट खारेज भएको छ ।

निर्वाचन बदर गरी पुनः निर्वाचन गराई पाउँ भन्दै खनालले दायर गरेको रिटमा बुधबार सर्वोच्च अदालतको संवैधानिक इजलासले खारेज हुने फैसला सुनाएको हो ।

२०७९ मङ्सिरमा भएको निर्वाचनको नेता खनाललाई नेकपा एमालेका महेश बस्नेतले पराजित गरेका थिए। बस्नेतले २५ हजार ७५३ मत ल्याउँदा खनालले २३ हजार ८९ मत प्राप्त गरेका थिए।

आफूले हार व्यहोर्नु परेपछि खनाल सर्वोच्च पुगेका थिए। निर्वाचनको मतदानमा धाँधली भएको दाबीसहित नेता खनालले इलाम १ मा पुनःनिर्वाचन गर्न माग गरेका थिए ।

रिट खारेज भएसँगै बस्नेतले वैधानिकता पाएका छन् । यसैगरी दोहर्याई मतगणना गरी पाउँ भनेर मुद्दा दायर गर्ने सुरेन्द्र प्रसाद चौधरी, महेन्द्र यादवको पनि रिट खारेज भएको छ।