गृहमन्त्रीलाई हृदयराम थानीको प्रश्नः ५० दिनपछि तपाईंले भाषा फेर्नुभएको छ, यस्तै तरिकाले गृह मन्त्रालय चल्छ ?
काठमाडौं । नेपाली कांग्रेसका सांसद हृदयराम थानीले उपप्रधान एवं गृहमन्त्री रवि लामिछाने निरीह भएको टिप्पणी गरेका छन् ।
मंगलबारको प्रतिनिधिसभा बैठकमा सांसद थानीले गृहमन्त्री सरकार बाहिर हुँदा र सरकारमा गएपछिका अभिव्यक्तिको तुलना गर्दा उहाँ निरीह देखिएको टिप्पणी गरेका हुन् ।
उनले सहकारी ठगीको नाइके जीबी राईलाई पक्राउ गरेर ल्याउँछु भनेर गृहमन्त्रीले बोलेको कुरा स्मरण गराउँदै पक्रेर देखाउन आग्रह गरे ।
उनले भने, ‘२०८० साल चैत्र १० गते जीबी राई आकाशा होस् कि पातालमा समातेर ल्याउँछु भन्नुभयो। गृहमन्त्रीजी यो कुरा याद छ कि छैन ? कहाँ गए आज जीबी राई ? त्यसको ठिक ५० दिनपछि वैशाख २९ गते तपाईंले भरतपुर विमानस्थलमा भन्नुभयो–जीबी राईलाई अघिल्लो सरकारले भगाएको भन्नुभयो । प्रधानमन्त्री पुष्पकमल दाहाल हुनुहुन्छ । पूर्वगृहमन्त्री नारायणकाजी श्रेष्ठ तपाईंको अगाडि हुनुहुन्छ। अघिल्लो सरकारले भगायो कि भगाएन। त्यसको दोष कसल लिने ? ५० दिनपछि तपाईंले भाषा फेर्नुभएको छ। यस्तै तरिकाले मुलुक चल्छ ? गृहमन्त्रालय चल्छ ?’
सांसद थानीले संसदमा यसअघि गृहमन्त्रीले दिएको अभिव्यक्तिको जिम्मेवारी लिनुपर्ने बताए । उनले गिरिबन्धु टी–स्टेट जग्गा छानबिन, क्यान्टोनमेन्टको घोटाला, ओम्नी र यती तीन वटा फाइल खोलेर छानबिन गरेर देखाउन चुनौती समेत दिए ।
थानीले तीन वटा फाइल खोल्यो भने देशका अधिकांश नेता जेलमा हुन्छन् भन्ने आफ्नो अभिव्यक्ति स्मरण गर्न आग्रह गरे । उनले भने, ‘तपाईंकै शब्दमा भन्छु गृहमन्त्रीज्यू तपाईंले मुटु सिंहको जस्तो हुनुपर्छ। फिस्टाको जत्रो होइन भन्नुभयो। तीनवटा फाइल कुनकुन हुन भन्न सक्नुहुन्छ ? सक्नुहुन्छ भने फाइल खोल्न किन ढिलो गर्नुभइरहेको छ ? गिरिबन्धु टी स्टेटको छानबिन गर्न तपाईंको सिंहको मुटु छ ? सक्नुहुन्छ तपाईंले ? क्यान्टोनमेन्टको घोटालाबारे छानबिन गर्न सक्नुहुन्छ। तपाईं ओम्नी र यतीको बारेमा छानबिन गर्न सक्नुहुन्छ ?’
उनले सत्तामा बसेर गृहमन्त्रीले कांग्रेसलाई धम्याइरहेको भन्दै निर्मलाको हत्यारा पत्ता लगाउँछु भनेर आफैँले गरेको निर्णय गृहमन्त्रीले पूरा नगरेको बताए।
