संसदका कर्मचारीले सेवा सुविधाको माग गर्दै धर्नामा बस्नु संसदकै लज्जाको विषय होः सांसद पन्त

काठमाडौं । नेकपा एमालेका सांसद रघुजी पन्तले संघीय संसद सचिवालयका कर्मचारीले सेवा सुविधा नपाउनु सदनकै लज्जाको विषय भएको बताएका छन् ।

मंगलबारको प्रतिनिधिसभा बैठकमा सांसद पन्तले संसद सचिवालयका कर्मचारका जायज माग तत्काल पूरा गर्न सरकारको ध्यानाकर्षण गराएका हुन् ।

सांसद पन्तले सङ्घीय संसद् सचिवालयका कर्मचारीको सेवा सुविधाको विषयमा सदनको ध्यानाकर्षण गराउँदै उचित सेवा सुविधाको प्रबन्ध गर्न माग गरे । कोरोनाकाल सुरू भएदेखि नै संसदका कर्मचारीले अतिरिक्त समयमा काम गरेको भत्ता नपाएको उनले बताए ।

उनले भने, ‘संसदमा प्रवेश गर्ने ठाउँमा कर्मचारीले बाटो छेकेर धर्ना गरिरहेको देखियो । जे सुविधा अरू मन्त्रालयका कर्मचारीले पाएका छन् त्यो सुविधा संसदका कर्मचारीले नपाउने भन्ने कुरा हुँदैन। उहाँहरूले हिजोको भत्ता माग्नुभएको छैन। कमसेकम अब अतिरिक्त समयमा काम गरेको भत्ता त पाउनुपर्यो भन्नु भएको छ । अर्थमन्त्रालय लगायत अन्यत्रका कर्मचारीले पाउने, संसदका कर्मचारीले किन नपाउने ? संसदभित्र यो दृश्य देखिनु आफैमा दुःखद हो ।’

उनले सांसदहरुलाई उपलब्ध गराउने पत्रपत्रिकाको सुविधा समेत कटौती भएको एवम् कर्मचारीको सेवा सुविधाका विषयमा तत्काल उचित निर्णय गर्न सरकारको ध्यानाकर्षण गराए ।

नियमले पाउने सेवा सुविधा भत्तालगायतका सुविधा उपलब्ध गराउन अर्थमन्त्री र अर्थमन्त्रालयको ध्यानाकर्षण गराउँदै आवश्यक पत्रपत्रिकाको बजेटसमेत कटौती नगर्न माग गरे ।

उनले भने, ‘सांसदहरूलाई पढ्न दिने पत्रिका पनि कटौती भएको छ। हाम्रो मुलुकको आर्थिक अवस्था त्यति कमजोर भएको हो ।’

अतिरिक्त समयमा काम गरेको भत्ता नपाएकोलगायत विभिन्न ११ बुँदे मागसहित गत जेठ मसान्तदेखि कर्मचारीहरू आन्दोलनमा छन् । कर्मचारीले सेवा सुविधाको माग गर्दै आन्दोलन जारी राखेपछि सभामुख देवराज घिमिरे र राष्ट्रिय सभा अध्यक्ष नारायणप्रसाद दाहालले सोमबार सदनका दुवै सभाका पदाधिकारीसहित दलका सचेतकहरूसँग छलफल गरी माग पूरा गर्ने आश्वासन दिएका थिए ।