मधेसमा ढल्यो जसपा नेतृत्वको सरकार, पाएनन् मुख्यमन्त्री यादवले विश्वासको मत

जनकपुरधाम । मधेस प्रदेशका मुख्यमन्त्री सरोजकुमार यादव विश्वासको मत लिन असफल भएका छन् । बुधबार साँझ प्रदेशसभामा मुख्यमन्त्री यादवले विश्वासको मत पाउन नसकेका हुन् ।

बैठकमा सहभागी १०३ सांसदमध्ये मुख्यमन्त्रीको पक्षमा ५० र विपक्षमा ५३ मत खसेको थियो । सभामुख रामचन्द्र मण्डलले उक्त संख्या कूल संख्याको बहुमत नरहेकाले मुख्यमन्त्रीले पेस गरेको प्रस्ताव अस्वीकृत गरेका थिए। योसँगै जनता समाजवादी पार्टी नेतृत्वको सरकार ढलेको छ।

अब नयाँ सरकार गठन गर्ने बाटो पनि खुलेको छ। केन्द्रीय गठबन्धनले जनमत पार्टीको नेतृत्वमा सरकार बनाउने तयारी गरेको छ। यसअघि नै जनमत पार्टीले नेकपा माओवादी र नेकपा एमालेसँग सरकार बनाउने विषयमा सहमति गरेको थियो ।