कांग्रेस नसच्चिए कम्युनिष्टहरुले यो व्यवस्था नै खारेज गरिदिन्छन् !

शारदाप्रसाद त्रिताल ।
नेपाली कांग्रेस ‘प्रचण्डांग्रेस’ को आवरणबाट बाहिर आउन लागेको जस्तो त देखिन थाल्यो तर ‘प्रचण्डपथ’ चरित्रको धङ्धङीबाट बाहिर आउन ढिलाई गरिरहेछ । २०५१ सालदेखि आफ्नो पार्टीको मूल चरित्रबाट विचलित हुँदै आएको नेपाली कांग्रेस अहिले ‘दाइभाउजु कम्पनी’ को रुपमा परिणत हुँदै पतनको अन्त्यतिर पुग्न लागेको छ । २०६२ सालतिरदेखि कम्युनिष्टहरुको कठपुतली बनेको कांग्रेस अहिले कम्युनिष्टको चरित्र नक्कल गर्दै कमजोर प्रदर्शन गर्न बाध्य छ, फलस्वरुप प्रजातान्त्रिक मूल्य मान्यतालाई तिलाञ्जली दिइसकेको अवस्थामा पुगेको छ ।
अहिले नेपाली कांग्रेसको नाम राखेर दाइभाउजु कम्पनीको रुपमा न प्रजातान्त्रिक मूल्य मान्यताको पालना र संरक्षण गर्न सक्षम छ न त कम्युनिष्ट चरित्र प्रदर्शन गरेर उनिहरुमाथि विजय प्राप्त गर्न नै सफल हुनेवाला छ । यो नै वर्तमान नेपाली कांग्रेसको सकस (म्ष्झिmब) हो । आफुले गर्दा त्यही कुरा ठीक र अरुले गर्दा वेठीक भन्ने चरित्र प्रपोगाण्डा हो । यो चरित्र कम्युनिष्ट वा तानाशाही सिद्धान्त अपनाउनेहरुको हो । प्रजातान्त्रिक सिद्धान्तमा आस्था राख्नेले प्रपोगाण्डामा विश्वास गर्दैन । तर अहिले दाइभाउजु कम्पनीको बचाउका लागि प्रपोगाण्डा प्रवृत्ति अपनाउन कांग्रेस विवस भएको देखिन्छ । त्यसैले, अब नेपाली कांग्रेसका सच्चा नेता र कार्यकर्ता बिउँझनु आवश्यक भइसकेकोछ ।
किन र कसरी ?

प्रजातान्त्रिक मूल्य मान्यता अनुरुप सरकारमा बस्नेहरुले गरेको गलत कार्यको संसदमा विरोध गर्नु विपक्षीको धर्म र अधिकार हो । सांकेतिक विरोध गरी जनताको ध्यानाकर्षण गराउने र त्यो मुद्धालाई संसदको अभिलेखमा राख्ने व्यवस्था गर्नु संसदीय चरित्र हो । तर कम्युनिष्टहरुको जस्तो संसदलाई नै निरन्तर बन्धक बनाउनु प्रजातान्त्रिक चरित्र होइन । विगतमा कम्युनिष्टहरुले लगातार ५७ दिन संसद अवरुद्ध गर्दा देशले भोगेको पीडाबारे प्रजातान्त्रिक हुँ भन्ने पार्टीले हेक्का राख्नु पर्ने हो । प्रजातान्त्रिक पार्टीले विपक्षमा बस्ता पद्धतिको लागि आवाज उठाउने र कार्य गर्ने हो र सरकारमा आएपछि त्यो पद्धति अनुरुप सरकार चलाई देशमा सुशासन कायम गर्ने हो । विपक्षमा बस्ता सरकारको विरोध मात्रै गर्ने र सरकारमा आएपछि पहिलेको सरकारले जस्तै गर्ने चरित्र प्रजातान्त्रिक होइन । प्रजातान्त्रिक पार्टीले विपक्षमा बसेको समयमा आफ्नो आन्तरिक प्रजातान्त्रिकरणलाई मजबूत बनाउन ध्यान दिने हो ता कि आउँदो निर्वाचन जित्न सहयोग पुगोस् । पार्टीमा चरम गुटबन्दी गर्ने, आसेपासेको संरक्षण गर्ने, भातृ र शुभेच्छुक संगठनलाई टीके प्रथाबाट नेतृत्वको चम्चागिरी गर्ने संयन्त्र बनाउने अनि प्रजातान्त्रको दुहाइ दिंदैमा अरुले प्रजातान्त्रिक मान्न सक्तैन र चुनाव जित्न पनि सकिंदैन।

प्रजातान्त्रिक पार्टीले विपक्षमा बसेको समयमा देशको विविध पक्षमा अध्ययन अनुसन्धान गर्ने गराउने र वास्तविकताको पहिचान गर्ने र सरकारमा आएपछि पहिचान गरिएका आवश्यकताको पूर्ति गर्ने हो । सत्तामा पुग्नको लागि जे पनि गर्न तयार हुने होइन । विपक्षमा बस्ता जुन कुराको विरोध गरिन्छ, सत्तामा आएपछि आफैंले विरोध गरेको विषयलाई अपनाउनु अप्रजातान्त्रिक चरित्र हो । अथवा, आफू सत्तामा हुँदा जुन खराबी गरिन्छ, अर्को पार्टी सरकारमा आएर त्यही खराबी गरेमा त्यसको विरोध गर्नु पनि सच्चा प्रजातान्त्रिक चरित्र होइन । पहिले आफूलाई सुधार गर्नु प्रजातान्त्रिक चरित्र हो । प्रजातान्त्रिक पार्टीले आफ्नो पार्टीको शुद्धीकरण गरेर उदाहरणीय बन्न सक्नुपर्छ । आफ्नोमा डुङ्डुङ्ती गन्हाउनेहरुलाई संरक्षण गरेर अरुलाई शुद्धीकरणको पाठ सिकाउनु सान्दर्भिक हुँदैन ।

भुटानी शरणार्थी काण्ड, टेरामक्स काण्ड र विशेष अदालतले दोषी ठहराएका सांसदको केशमा नेतृत्वले खेलेको भूमिका कसैले विर्सेका छैनन् । यस्ता कुरालाई लुकाएर अरुप्रति नाच देखाएर प्रजातान्त्रिक हुइँदैन । नेपाली कांग्रेसका सच्चा नेता तथा कार्यकर्ताले यस बारेमा गम्भीर भएर समीक्षा गर्नु जरुरी छ । धेरैजसो अव्यवस्थाको शुरुवात कांग्रेसले गर्दै जाने र त्यसलाई भर्याङ् बनाएर कम्युनिष्टहरुले संसदीय व्यवस्था नै खराब हो भन्ने देखाइरहेका छन् । वर्तमान अवस्था अरु केही समय कायम रहेमा कम्युनिष्टहरुले यो व्यवस्था नै खारेज गर्दिन्छन् । सच्चा कांग्रेसले यसमा गम्भीर हुनुपर्छ । प्रजातन्त्रको आधारभूत पक्ष सुशासन हो । सुशासन कानूनको शासनको माध्यमबाट हासिल गर्न सकिन्छ । सुशासन हासिल गर्ने अर्को मुख्य हतियार पद्धतिको विकास र त्यसको परिपालना हो भन्ने सत्यलाई जवसम्म आत्मसात गरिंदैन, तवसम्म प्रजातान्त्रिक मूल्य मान्यताको संरक्षण गर्न सकिंदैन । जबसम्म सुशासन कायम हुन सक्तैन, तवसम्म देशको समुन्नति पनि सम्भव हुँदैन । तसर्थ; नेपाली कांग्रेसका सच्चा नेता र कार्यकर्ताहरु बिउँझनुहोस् । दाइभाउजु कम्पनीको तावेदारी छोडी नेपाली कांग्रेसलाई जनसमक्ष ल्याउनु होस् ।