संसदीय समितिको कार्यादेशमा सत्तापक्ष र प्रतिपक्षीको असहमति कायमै

काठमाडौं । सहकारी ठगीका विषयमा छानबिन गर्न गठन गर्ने भनिएको संसदीय छानबिन समितिको कार्यादेश टुंगो लगाउन बसेको कार्यदलको बैठक बिना निष्कर्ष टुंगिएको छ ।

कानुन मन्त्रालयमा बसेको कार्यदलको बैठकले आज पनि कार्यादेशको टुंगो लगाउन नसकेको हो । बैठकमा विभिन्न विकल्पहरूबारे छलफल भएको भएपनि निष्कर्षमा भने पुगिनसकेको कानून, न्याय तथा संसदीय मामिलामन्त्री पदम गिरीले जानकारी दिए ।

नेपाली कांग्रेसले गृहमन्त्री रवि लामिछानेको नामै उल्लेख गरी उनी मुछिएको सहकारी संस्थामा पनि छानबिन गर्नुपर्ने अडान राखेको छ भने एमाले र रास्वपाले भने त्यसलाई अस्वीकार गरेका छन् । जसका कारण सहमति जुट्न नसकेको हो ।

नेकपा एमालेका प्रमुख सचेतक महेशकुमार बर्तौलाले बैठक सौहार्दपूर्ण भएको र सहमति गरेर विषय टुंग्याउने कुरामा छलफल भएको बताए। नाम किटान गरेर जाँदा असहज हुने भएकाले त्यसरी नजाने कुरा सत्ता पक्षबाट आवाज आएको बताए।

नेपाली कांग्रेसका सांसद जीवन परियारले सहकारीको रकम अपचलनमा उपप्रधानमन्त्री एवं गृहमन्त्री संलग्न रहेको कुरा आफूहरूले बैठकमा उठाएको बताए । संसदीय समिति गठन नहुँदा संसदको गतिरोध पनि अन्त्य हुन सकेको छैन ।