एमालेले रविको नाम राखेर संसदीय समिति नबन्ने बताएपछि जुटने कार्यदलमा सहमति

काठमाडौं । सहकारी प्रकरणमा छानबिनका लागि बन्ने संसदीय समितिको कार्यादेश (टीओआर) बनाउन गठित कार्यदलको बैठक विना निषकर्ष टुंगिएको छ ।

सत्ता पक्ष र प्रमुख प्रतिपक्षी नेपाली कांग्रेस आआफ्नो अडान नछाड्दा बैठक निष्कर्षबिहीन भएको हो । कार्यदल सदस्य एवं कांग्रेस नेता जीवन परियारले छानबिनको दायरामा ल्याउनुपर्ने व्यक्तिलाई दायरामा नल्याउने कुरामा आफूहरुको असहमति रहेको बताए ।

सत्ता पक्षले गृहमन्त्री रवि लामिछानेको नाम राख्न नमानेपछि बैठकमा सहमति नजुटेको हो । कांग्रेस प्रमुख सचेतक रमेश लेखकले सरकार संसदीय समिति बनाउन तयार भएपनि आरोप लागेका गृहमन्त्री लामिछानेमाथि अनुसन्धान गर्न तयार नदेखिएको बताए ।

उनले भने, ‘संसदीय छानबिन समिति बनाउने भन्नेकुरामा सहमति नै छ । तर सत्तापक्षका साथीहरुको कस्तो देखियो भने झापामा आगो लाग्यो कञ्चनपुरमा निभाउन जाउँ भने जस्तो देखियो । संघीय संसदमा देशभरमा जे विषय उठेको छ । त्यो विषयका बारेमा प्रवेश नगर्ने, बोल्दै नबोल्ने र त्यो बाहेकका अरु कुरामा प्रवेश गरेर झारो टार्ने रुपमा प्रस्तुत हुनुभएकाले कुरा मिलिरहेको छैन ।’ उनले गृहमन्त्री लामिछानेमाथि आरोप लागेकाले उनको नाम समावेश गरेर मात्र संसदीय समिति बनाउनुपर्ने पक्षमा कांग्रेस रहेको बताए।

कार्यदल सदस्य तथा रास्वपाका नेता शिशिर खनालले एक व्यक्तिलाई दोषी करार गरेर समिति बन्न नसक्ने बताए ।उनले भने, ‘कांग्रेसका साथीहरुले ल्याउनुभएको भाषामा दोषी करार गरेको देखिन्छ । टीओआर बनाउँदा फलानो दोषी हो भन्ने विषयमा असहमति छ ।’ टिओआरमा सहमति जुटाउन बिहानैदेखि कार्यदल जुटेपनि सहमति नबन्दा संसद संचालनमा अन्यौल देखिएको छ ।