सत्ता गठबन्धनका दलहरुबीच राष्ट्रियसभामा यसरी सिट बाँडफाँट हुँदै
काठमाडौं । राष्ट्रियसभामा सिट बाँडफाँटमा भएको सहमतिलाई अन्तिम रुप दिन सत्ता गठबन्धनको बैठक अहिले बसिरहेको छ । गएराति भएको बैठकमा सहमति नजिक पुगेका गठबन्धन दलका नेताहरु त्यसलाई अन्तिम रुप दिन जुटेका हुन् ।
बैठकमा नेपाली कांग्रेस, नेकपा माओवादी केन्द्र, एकीकृत समाजवादी र जनता समाजवादीका शीर्ष नेताहरू सहभागी छन् । गएरातिको बैठकमा सहभागी नेताहरुका अनुसार निर्वाचन हुने १९ सिटमध्ये नेपाली कांग्रेसले १०, माओवादी केन्द्रले ६, नेकपा (एकीकृत समाजवादी) ले दुई र जनता समाजवादी पार्टी (जसपा) ले एक सिट लिने गरी मोटामोटी सहमति भएको छ ।
तर, बैठकमा एकीकृत समाजवादीले भने आफूलाई कम सिट भएको भन्दै असहमति जनाएको बताइएको छ । राष्ट्रिय सभा निर्वाचनमा दलहरुको दाबी रिक्त सिट संख्या भन्दा बढी भएपछि सत्ता गठबन्धनमा भागवण्डा मिलाउन सकस भैरहेको थियो ।
हिजै बसेको सत्ता गठबन्धनको बैठकमा निर्वाचनमा प्रमुख प्रतिपक्षी दल नेकपा एमालेलाई कुनैपनि सिट नदिने सहमति भएको थियो । यसअघि प्रमुख प्रतिपक्षी दल एमालेले राष्ट्रिय सभामा आफुलाई समेत सिट दिन आग्रह गरेको थियो ।गठबन्धन दलले साझा उम्मेदवार उठाउने भएपछि एमालेले पनि १९ सिटमा एक्लै उम्मेदवार उठाउने तयारी गरेको छ ।
