एनसेल प्रकरण गरिएको दुष्प्रचारको प्रतिवाद गर्न प्रधानमन्त्रीको निर्देशन
काठमाडौँ । प्रधानमन्त्री पुष्पकलम दाहाल प्रचण्डले एनसेल प्रकरणमा भइरहेको गलत प्रचारप्रति आपत्ति जनाएका छन् । सोमबार प्रेस सेन्टर नेपालले पार्टी मुख्यालय पेरिसडाँडामा आयोजना गरेको कार्यक्रममा प्रधानमन्त्रीले त्यसको प्रतिवाद गर्न निर्देशन दिएका छन् ।
आफू युएईमा भएका बेला एनसेलको शेयर बिक्रीको कुरा सुनेको र आउने बितिक्कै छानबिन गर्न निर्देशन दिएको भन्दै प्रधानमन्त्रीले सरकारले यस्तो गर्दा पनि तल्लोस्तरको प्रचार गरिएको भन्दै आपत्ति जनाएका हुन् ।
उनले भने, ‘एनसेलको शेयर बिक्रीबारे युएईबाट फर्केलगत्तै क्याबिनेटको बैठक राखेर छानबिन समिति बनाएँ । तर अतिवादीहरूबाट घटिया रुपमा प्रचार र दुस्प्रचार गरियो । तपाईं कल्पना गर्नोस् यति तल्लो तहबाट प्रचार भएका छन् त्यसलाई प्रतिवाद गर्नुपर्छ ।’
प्रधानमन्त्रीले राम्रो काम गर्दा गर्दै पनि सरकारविरुद्ध चौतर्फी घेराबन्दी गरिएको बताए । उनले शान्ति प्रक्रियाका बाँकी काम टुंग्याउन सरकारले प्रयास गरिरहेको बताए ।
उनले भने, ‘शान्ति प्रक्रियाका बाँकी काम टुंग्याउने प्रयासमा सरकार लागिरहेको छ। सरकारविरुद्ध अर्को ठाउँबाट प्रहार हुँदैछ । सरकारका राम्रा काम लुकाएर बदनाम गर्न खोजिँदैछ, आक्रमण गरिँदैछ।’
दाहालले राष्ट्र र जनताका पक्षमा काम गर्न सकिने अवसर रहेको बताउँदै अर्थतन्त्रमा पनि सुधार हुँदै गएको बताए । प्रधानमन्त्रीले प्रतिक्रियावादी र अवसरवादीलाई अहिलेको सुधार मन नपरेको बताए । उनले भने, ‘हामी सुधारको प्रयासमा छौँ। लोकतन्त्र र अहिलेको व्यवस्था बलियो बनाएर प्रतिक्रियावादीहरूलाई टाउको उठाउन दिँदैनौँ।’
