गाजाबाट १३ इजरायली र १२ जना थाइ बन्धक रेडक्रसलाई हस्तान्तरण
बीबीसी । हमासले नियन्त्रणमा लिएका १३ जना इजरायली बन्धकहरू रेडक्रसलाई बुझाइएको छ । त्यसैगरी बेग्लै सहमति अनुसार भन्दै थाइल्याण्डका प्रधानमन्त्रीले हमासले बन्धक बनाएका १२ जना थाइ नागरिक रिहा भएको बताएका छन् ।
गाजाबाट रफाह नाकामा इजरायली सुरक्षाकर्मीहरूले मुक्त भएका मानिसहरूको परिचय जाँच गर्ने छन् । त्यहाँ उनीहरूको स्वास्थ्य परीक्षण पनि हुने छ। त्यहाँबाट उनीहरूलाई हेलिकप्टरमा राखेर इजरायली सीमाभित्र लगिने छ ।
कतारले मध्यस्तता गरेको चारदिने अस्थायी युद्धविराम र बन्दी साटफेर गर्ने सम्झौता अनुसार शुक्रबार नै इजरायलले महिला र बालबालिका सहितका ३९ प्यालेस्टिनी बन्दीहरू रिहा गर्दैछ । इजरायल–हमास युद्धमा शुक्रबार बिहान ७ बजे अस्थायी युद्धविराम सुरु भएको थियो ।
इजरायल–हमास सहमतिअन्तर्गत चार दिनको युद्धविरामको अवधिमा हमासले गाजाबाट कुल ५० जना बन्धकहरूलाई मुक्त गर्ने छ भने इजरायलले १५० जना प्यालेस्टिनी बन्दीहरूलाई रिहा गर्ने छ ।
अस्थायी युद्धविराम सहमति अन्तर्गत सहायता बोकेका कम्तीमा ६० ट्रकहरू इजिप्टतर्फको रफाह नाका हुँदै गाजा प्रवेश गरेका छन् । इजरेलका अनुसार तीमध्ये आठ वटाले इन्धन बोकेका छन् ।
इजरायलले मानवीय युद्धविराम अस्थायी स्वरूपको भएको भन्दै उत्तरी गाजातर्फ नफर्कन चेतावनी दिए पनि केही प्यालेस्टिनीहरू घर फर्कन थालेका छन् । अक्टोबर ७ मा हमासले इजरायलमा गरेको आक्रमणमा १२ सय जना मानिसहरू मारिएका थिए। त्यसबेला नै हमलाकारीहरूले २४० जनालाई बन्धक बनाएका थिए ।