बन्धक छुटाउन हमासविरुद्धको आक्रमण रोक्न इजरायल सहमत
काठमाडौं । हमासको कब्जामा रहेका बन्धक रिहा गर्ने सम्झौतलाई इजरायलले स्वीकृत गरेको छ । इजरायलको मन्त्रिपरिषद बैठकले बन्धक रिहा गर्ने सम्झौता स्वीकृत गरेको हो ।
सम्झौताअनुसार हमासले बन्धक बनाएका ५० जना इजरायली नागरिकलाई चार दिनभित्र रिहा गर्नेछ । यस अवधिमा युद्ध अस्थायी रूपमा रोकिने छ । इजरायल र हमासबीच बन्धक रिहाको विषयमा कतारले मध्यस्थता गरिरहेको छ । कतारकै मध्यस्थतामा हमासले यसअघि पनि ४ जना बन्धक छाडेको थियो ।
कतारी अधिकारीहरूले बुधबार बिहान इजरायललाई सम्झौताको प्रस्ताव पेस गरेका थिए । त्यसपछि बसेको इजरायली मन्त्रिपरिषद् बैठकले उक्त प्रस्तावलाई स्वीकृत गरेको हो ।
हमासले पनि टेलिग्राममा मानवीय आधारमा युद्धविरामका लागि सहमति भएको जनाएको छ । हमासले इजिप्ट र कतारलाई मध्यस्थताका लागि धन्यवादसमेत दिएको छ । इजरायली प्रधानमन्त्री बेन्यामिन नेतान्याहुले सबै जना बन्धक सुरक्षित रूपमा घर फर्किएपछि पुनः हमासविरुद्धको कारबाही सुरु हुने बताएका छन् ।