‘संविधानमा आउने व्यावहारिक कठिनाइ समाधान गर्न कांग्रेसले नेतृत्व लिनुपर्छ’
काठमाडौं । कार्यवाहक प्रधानमन्त्री पूर्णबहादुर खड्काले संविधानमा आउने व्यावहारिक कठिनाइ समाधान गर्नका लागि नेपाली कांग्रेसले नेतृत्व लिनुपर्ने बताएका छन् ।
नेपाली कांग्रेस केन्द्रीय कार्यालयमा जारी बैठकमा केन्द्रीय पदाधिकारीहरू तथा सदस्यहरूले उठाएका प्रश्न र सवालको जवाफ दिनेक्रममा उपसभापतिसमेत रहेका खड्काले भने, ‘विभिन्न जातजाति, समुदायको गुनासो रहँदारहँदै पनि समय क्रमअनुसार संशोधन गर्दै जाउँला भनेर तत्कालीन सभापति तथा प्रधानमन्त्री सुशील कोइरालाको नेतृत्वमा संविधान जारी भएको हो । संविधानमा केही व्यावहारिक कठिनाइ आउन सक्छन्, त्यसलाई समाधान गर्न संशोधन गर्न कांग्रेसले नेतृत्व लिनुपर्छ । आजसम्म कांग्रेसले मध्यमार्गी धारबाट नेतृत्व गर्दै मुलुकलाई डोहोर्याएकोमा अलिकति मात्रै तलमाथि भयो भने यी सबै उपलब्धि गर्ल्यामगुर्लुम ढल्नेछन् । यो कुरा हामीले बिर्सिनुहुँदैन ।’
उनले संविधान बनाएपछि आठ वर्षसम्म पनि सङ्घीय लोकतान्त्रिक गणतन्त्रले परिकल्पना गरेको विषयलाई ऐन, कानून बनाएर सम्बोधन गर्न र कार्यान्वयन गर्न दलहरू चुकेको धारणा राख्दै अब तीव्र गतिमा संविधानले परिकल्पना गरेका सङ्घीय ऐनहरू बनाएर सङ्घ, प्रदेश र स्थानीय तहको काम, अधिकार र समन्वयको सन्दर्भमा नेपाली कांग्रेसले नेतृत्व लिनुपर्ने बताए ।
खड्काले सबै मन्त्रालयलाई आफ्ना मन्त्रालयसँग सम्बन्धित कानून निर्माणका लागि आवश्यक पहल गर्न प्रधानमन्त्रीबाट मन्त्रिपरिषद् बैठकमा एक महिना अगाडि नै निर्देशन भएको प्रष्ट पारे ।
उनले वर्तमान मुलुकको परिस्थिति, धार्मिक, जातीय, क्षेत्रीय कुरा आउँदा देखिएका सङ्केत राम्रो नभएको भन्दै नेपाली कांग्रेसले जातीय, धार्मिक, क्षेत्रीय र दलबीचको सद्भाव कायम गर्नुपर्ने बताए ।
