रवि लामिछानेको प्रश्नः गृहमन्त्री र प्रधानमन्त्रीको मुटु कहाँ लगेर चेक गर्ने ?
काठमाडौं । राष्ट्रिय स्वतन्त्र पार्टीका सभापति रवि लामिछानेले नक्कली शरणार्थी प्रकरणमा संसदीय विशेष छानबिन समिति बनाउन माग गरेका छन् ।
बुधबारको प्रतिनिधिसभा बैठकको सुरुमै सभापति लामिछानेले नक्कली शरणार्थी प्रकरणको अनुसन्धान शंकका घेरामा रहेकाले संसदीय विशेष समिति बनाएर छानबिन गर्न माग गरेका हुन् । उनले यस प्रकरणमा अनुसन्धान गर्ने अधिकारी र प्रमुखको नामसमेत आएकाले सबैलाई अनुसन्धानको दायरामा ल्याउनुपर्ने बताए ।
उनले भने, ‘हामी भ्रष्टाचारका विषयमा बारम्बार कुरा उठाउँदै आएका थियौँ । तीन दल खुसुखुस बस्दा हामीले आशंका नगरेका होइनौँ । अहिले अनुसन्धान गर्ने अधिकारी र प्रमुखको नाम आउँदा पनि अनुसन्धान भएको छैन । त्यसैले संसदीय छानबिन समिति बनाइयोस् ।’
सभापति लामिछानेले नक्कली शरणार्थी प्रकरणमा अँध्यारो कोठामा नभई दिउँसै सिंहदरबारदेखि बालुवाटारसम्म लेनदेन भएको दाबी गरे ।
उनले भने, ‘यो प्रकरणमा सिंहदरबार, मन्त्री क्वार्टर र बालुवाटारमा लेनदेन भएको छ । अब विश्वासको वातावरण बन्द भएको छ । संसदीय विशेष समिति बनाउनुपर्छ । जसजसको नाम आएको छ छानबिनको दायरामा ल्याउन किन डराएको ? गृहमन्त्री र प्रधानमन्त्रीले मुटु दरो छ भन्नु भएको थियो । किन डराएको ? उहाँहरुको मुटु कहाँ गएर चेक गर्ने ?’
