कांग्रेस सांसद सञ्जय गौतम आमरण अनसनमा
काठमाडौं । विभिन्न १५ बुँदे माग राख्दै नेपाली कांग्रेसका सांसद सञ्जयकुमार गौतमले आमरण अनशन सुरु गरेका छन् । बर्दिया क्षेत्र नम्बर–१ बाट प्रतिनिधिसभा सदस्य निर्वाचित गौतमले आफ्नो निर्वाचन क्षेत्रमा पर्ने जब्दीघाटको भत्किएको पुलमुनि टेन्ट लगाएर आमरण अनशन सुरु गरेका हुन् ।
जब्दीघाटको भत्किएको पुल निर्माणको काम सुरु गर्नुपर्ने, सदरमुकाम डुबान र कटानको कारण जोखिममा रहेको भन्दै तटबन्धनका काम गर्नुपर्ने, सिँचाइ आयोजनाहरूमा बजेट सुनिश्चित हुनुपर्ने लगायतका माग राखेर उनी अनशन बसेका हुन् ।
सदनमा कैयौँ पटक जब्दीघाटको पुल निर्माणको आवाज उठाए पनि राज्यले बेवास्ता गरेकोले बाध्य भएर आमरण अनशनमा बस्नुपरेको गौतमको भनाइ छ ।
