‘भारतको सामान्य कर्मचारी आउँदा राष्ट्रप्रमुखदेखि पूर्वप्रधानमन्त्री र मन्त्रीहरु किन लम्पसार ?’
काठमाडौं । राष्ट्रिय जनमोर्चाका सांसद चित्रबहादुर केसीले शक्ति राष्ट्रहरुले यसपटक राष्ट्रपतिको चुनावमा प्रत्यक्ष रुपमा नै भूमिका खेलेको बताएका छन् ।
बुधबारको प्रतिनिधिसभा बैठकमा सांसद केसीले विगतमा प्रत्यक्षरुपमा भूमिका खेलेपनि यसपटक शक्ति राष्ट्रले राष्ट्रपतिको चुनावमा प्रत्यक्ष भूमिका खेलेको बताएका हुन् ।
केसीले शक्ति राष्ट्रहरुले स्वार्थअनुकुल राष्ट्रपतिका लागि भूमिका खेलिरहेको बताए । उनले यसले नेपालको स्वाभिमान, नेपालको राष्ट्रियता र सार्वभौम अखण्डतामाथि दखल भइरहेको बताए ।
उनले भारतको सामान्य कर्मचारी आउँदा पूर्वप्रधानमन्त्रीहरुदेखि मन्त्रीहरु र राष्ट्रप्रमुख नै लम्पसार परेको आरोप लगाउँदै यसले देशको इज्जत र प्रतिष्ठामा आँच आएको बताए।
उनले भने,‘छिमेकी राष्ट्र भारतबाट विदेश सचिव आए । उनी त एउटा कर्मचारी हुन् । उहाँले नेपालका राष्ट्र प्रमुख, सरकार प्रमुख, लगायत विभिन्न मानिसहरुको बीचमा उहाँले भेटघाटको अभियान चलाउनु भयो । नेपालका राष्ट्र प्रमुख, सरकारप्रमुख, विभिन्न तहका मानिसहरु आफूलाई असाध्यै जान्नेसुन्ने र देशको स्वाभिमान हुँ भन्दै मुन्टो हल्लाउँदै हिँड्ने, किन यसरी विदेशीहरुको अघि लम्पसार परिरहेका छन् ? राष्ट्रिय स्वाभिमानको बारेमा उहाँहरुलाई अलिकति लाज लाग्दैन । राष्ट्रपति कसलाई बनाउने भन्ने चर्चाको विषय छ । त्यस सम्बन्धमा शक्ति राष्ट्रहरुले राष्ट्रपतिको चुनावमा अप्रत्यक्ष रुपले हुने गर्दथ्यो, अहिले त प्रत्यक्ष रुपले नै आफ्नो देशको अनुकुल मान्छे राष्ट्रपति बनाउने खेल भइरहेको छ ।’
उनले नेपालमा गणतन्त्र माथिको खतरा गणतन्त्र पक्षधरहरुबाट भइरहेको बताए ।