अर्याल राष्ट्रियसभा उपाध्यक्षमा निर्विरोध निर्वाचित भएको घोषणा गरिँदै

काठमाडौं । राष्ट्रियसभा उपाध्यक्षका लागि आज निर्वाचन हुँदैछ । तर उपाध्यक्ष पदमा नेकपा माओवादी केन्द्रकी उर्मिला अर्यालको मात्र उम्मेदवारी परेकाले उनलाई निर्विरोध निर्वाचित भएको औपचारिक घोषणा गरिंदैछ । आज मध्याह्न बस्ने राष्ट्रियसभा बैठकबाट उपाध्यक्ष पदमा अर्याल निर्विरोध निर्वाचित भएको घोषणा गर्न लागिएको हो ।

यसअघि उपाध्यक्ष रहेकी शशीकला दाहालको चार वर्षे कार्यकाल २०७८ सालमै सकिएको थियो । आइतबार मनोनयन दर्ताको दिन सत्ता साझेदार दलहरुको तर्फबाट अर्यालको मात्र उम्मेदवारी परेपछि उनी निर्विरोध भएकी हुन् ।

राष्ट्रिय सभाको आजको बैठकको कार्यसूचीमा अर्याललाई राष्ट्रिय सभाको उपाध्यक्ष पदमा निवार्चित गरियोस् भन्ने प्रस्ताव पेश हुने, सो प्रस्तावलाई समर्थकले समर्थन गर्ने, उम्मेदवारको विषयमा संक्षिप्त छलफल हुने र राष्ट्रिय सभा अध्यक्ष गणेश प्रसाद तिमिल्सिनाले अर्याललाई राष्ट्रिय सभाको उपाध्यक्ष पदमा निर्वाचित गरियोस् भन्ने प्रस्ताव निर्णयार्थ प्रस्तुत गर्ने कार्यक्रम छ ।