देशलाई आर्थिक सञ्जालको कालोसूचीमा पर्नबाट जोगाउन पौडेलको माग
काठमाडौँ । नेपाली कांग्रेसका सांसद प्रदीप पौडेलले सरकारले सम्पत्ती शुद्धीकरण सम्बन्धी विधेयक संसदमा प्रस्तुत नगरेको भन्दै आपत्ति जनाएका छन् ।
आइतबारको प्रतिनिधिसभा बैठकमा सांसद पौडेलले यथाशिघ्र विधेयक संसदमा ल्याउन र पारित गरेर नेपाललाई अन्तर्राष्ट्रिय आर्थिक सञ्जालहरूमा कालोसूचीमा पर्नबाट बचाउन माग गरेका हुन् । उनले एफएटीएफले तोकेको मापदण्ड पूरा नगर्दा कतिपय ठूला देशहरू आर्थिक विकासको ठूला सञ्जालबाट बाहिरिएका भन्दै सरकारलाई त्यसतर्फ ध्यान दिन आग्रह गरे ।
उनले भने, ‘गत पुसमा एफएटीएफको टोली नेपालको स्थलगत मूल्यांकन गरेर फर्किएको छ । उसले नेपाललाई तत्काल यससम्बन्धी कानुन बनाउ, नत्र तिम्रो देश ग्रे जोनमा पर्छ भनेर सुझाव दिएको छ । यस्तोमा हाम्रोजस्तो देशले दण्डित हुने अवस्था बन्यो भने संकटपूर्ण अवस्था आउन सक्छ ।’
