मधेश प्रदेशमा सरकार गठनका लागि दलहरुलाई प्रदेश प्रमुखको अह्वान
जनकपुरधाम । मधेश प्रदेशमा सरकार गठनका लागि पुस २८ गतेसम्मको समय दिइएको छ । शुक्रबार प्रदेश प्रमुख हरिशंकर मिश्रले सरकार गठनका लागि आह्वान गर्दै पुस २८ गतेसम्मको समय दिएका हुन् ।
उनले पुस २८ गते अपरान्ह ४ बजेसम्म संविधानको धारा १६८ (२) अनुसार मुख्यमन्त्रीमा दावी पेश गर्न आह्वान गरेका हुन् । मधेश प्रदेशसभामा कुनै दलको बहुमत नभएकाले दुई वा दुई भन्दा बढी दलको समर्थनमा बहुमत प्राप्त प्रदेशसभा सदस्यलाई मुख्यमन्त्रीमा दावी पेश गर्न आह्वान गरिएको छ ।
१०७ सदस्यीय मधेश प्रदेशसभामा नेकपा एमाले २३, नेपाली कांग्रेस २२, जसपा १६, जनमत १३, लोसपा र माओवादी केन्द्र ९/९, एकीकृत समाजवादी ७, नागरिक उन्मुक्ति पार्टी, राप्रपा र नेपाल संघीय समाजवादी १–१ र पाँच स्वतन्त्र सांसद छन् ।