कम्तिमा गठबन्धन टुटेको देउवाका कारण होइन
नारायण गाउँले ।
संसदीय दलमा गगनलाई जिताएको भए चीज अर्कै हुन्थ्यो भन्ने केही कांग्रेसी तर्कसँग चाहिँ सहमत हुन सकिएन । गगनले जितेको भए प्रचण्ड आजको साटो हिजै बालकोट पुग्थे । चीज यस्तै हुन्थ्यो, तर अलि छिटो हुन्थ्यो । के गगन थापालाई प्रचण्डले छोड्थे तर देउवालाई छोड़ेनन् भन्ने बुझाइ हो ? कि गगन भएको भए प्रचण्डलाई छोड्थे, देउवाले छोड़ेनन् भन्ने हो ? गगन भएको भए माओवादीबिना सरकार बन्थ्यो भन्ने पनि कसैलाई लागेको होला । तर केपी ओलीको ईशारा बिना राजेन्द्र लिङ्देन र अशोक राई गगनसँग आउने ग्यारेन्टी के थियो र ? गगन थापालाई समर्थन गरेर एमालेले रिस्क लिने सम्भावना झनै थिएन ।
जसको जत्ति गल्ती हो, दोष पनि त्यत्ति नै दिनुपर्छ । कम्तिमा गठबन्धन टुटेको देउवाका कारण होइन । उनी त श्रीमतीलाई उपप्रम दिने शर्तमा प्रधानमन्त्री बन्न दुई वर्ष कुर्न तयार नै हुन्थे । गठबन्धन देउवाको चाहना थियो । गगन थापा लगायतका अन्य नेता त शुरूदेखि नै विरोधमैं थिए । कांग्रेसले माओवादीलाई प्रधानमन्त्री दिएको तर देउवाले नदिएको अवस्था होइन ।
त्यस्तो भएको भए परिणाम यस्तै हुन्थ्यो भन्ने ठोकुवा गर्नु त व्यर्थ नै हो तर कांग्रेसले यसपाली गगन थापालाई प्रधानमन्त्रीका रूपमा अघि सारेर चुनाबमा गएको भए अवस्था फरक हुन सक्थ्यो । विकल्प खोजिरहेको राजनैतिक माहोलले छुट्टै गति लिन सक्थ्यो । तटस्थ मतहरू मात्रै होइन, नो, नट अगेनले तितरबितर पारेको केही मत कांग्रेसले पाउन सक्थ्यो । देउवाजस्तो असान्दर्भिक र बोरिङ व्यक्तिलाई नै प्रधानमन्त्री बनाउनका लागि कति कांग्रेसीहरू शायद भोट हाल्नै गएनन् ।
कांग्रेस र देशको यो दुरवस्थामा देउवाको ठूलो हात छ । तर, आजको घटनामा अन्य कांग्रेसीले उनलाई दोष दिनुको औचित्यचाहिँ अलिकति पनि भेट्न सकिएन । तपाईंसँग छ कि ?
