यो डरको र करको राजनीति होः रामचन्द्र पौडेल
चितवन । नेपाली कांग्रेसका वरिष्ठ नेता रामचन्द्र पौडेलले मंसिरमा हुने संघीय र प्रदेशसभा निर्वाचनमा राजनीतिक संकट टार्नका लागि गठबन्धन गरिएको बताएका छन् ।
आइतबार नेपाल प्रेस युनियन चितवनले भरतपुरमा आयोजना गरेको पत्रकार सम्मेलनमा पौडेलले तालमेल गरेर जानपर्ने आवश्यकता अनुसार कांग्रेसले गठबन्धनको निर्णय गरेको बताएका हुन् ।
पौडेलले धरातलीय यथार्थताको आधारमा सिट बाँडेर गठबन्धन गरिने उल्लेख गरे । उनले भने,‘मुलुकलाई सुशासन चाहिएको छ । त्यसका लागी नैतिक शक्ति चाहिएको छ । अहिलेको गठबन्धन भनेको संविधानको आवश्यकता अनुसार हो । हामीले गठबन्धन नगरे अरुले गर्छन् ? यो डरको र करको राजनीति हो ।’
दुवै सदनबाट बहुमतले पारित नागरिकता विधेयक प्रमाणीकरणमा राष्ट्रपति विद्यादेवी भण्डारीले ढिलाइ गरेको भन्दै असन्तुुुुष्टि जनाए । उनले भने, ‘संसदले पारित गरेर पठाएको विधयेक स्वीकृत गर्न राष्ट्रपतिले अलमल गर्न हुन्थेन । राष्ट्रपति कार्यालयले प्रष्टीकरण दिइरहने अवस्था नगरुन् भन्ने हो ।’