यिनका चिनिएका चौवन्नी कार्यकर्ता भएको भए देशमा आगो बल्थ्यो, तर निहारीकाका पक्षमा…?
गुरु भट्टराई ।
१७ वर्षकी केटी हिरोइन हुने लोभमा खै के के गुमाइछन् । जे भएपनि सामाजिक अनुशासन उल्लंघन गर्नेलाई नेपालको कानुनले अपराध ठान्छ । निहारीका त हिरोइन पनि हैनन् । बलात्कार गर्ने हिरो पनि हैन । बलात्कार गर्ने अलिक सम्पत्ति भएको मान्छे भएपछि राजनितिक आड नभएकी, सम्पत्ति नभएकी निहारीकाहरु अस्मिता सडकमा प्रदर्शन गर्नुपर्ने ? निहारिका नेमसंघ, अनेमसंघ, माओबादी महिला संगठनसँग सम्बन्ध सदस्य भएको भए माइतीघरमा टायर बल्थ्यो, प्रहरीको रबरको गोली चल्थ्यो, पानीको फोहोरा चल्थ्यो ।
निहारीकाहरुको नाममा न सरकार छ, न कांग्रेस छ, न एमाले, न माउवादी । यिनका चिनिएका चौवन्नी कार्यकर्ता भएको भएपनि देशमा आगो बल्थ्यो । लास बनाइएकी निर्मलाको नाममा थुप्रैले पैसा कमाए, राजनीति गरे, एनजिओ चलाए– न्याय पाइनन् प्रमाण छैन भनेर । तर अपराधको प्रमाण काखमा बोकेर राजधानीको सडकमा सुतेकी निहारिकाहरु यो देशले देख्दैन । जंगली राज भनेकै यही हो । पैसा, बन्दुक र सत्तासँग नजिक भएमात्र बाँच्न सकिन्छ । नत्र त जीवन जीउन पनि कठीन भो यो देशमा ।
अरुसँग गुनासो छैन तर संसदमा एमाले सांसदहरु यो बिषय किन उठाउदैनन् ? विमला ओली प्रवृत्ति हामीले स्वीकारेका हौं ? न्याय भनेको सत्ता, पैसा, बन्दुक हो भन्ने कुरा पुष्टि हुँदै गयो भने त्यस्तो देश र समाज निकट समयमा पतनको बाटोमा छ भन्ने बुझ्नुपर्छ ।के हामी यस्तै चाहन्छौ ?
