टाँगेर निधारमा राष्ट्रियताको रातो तुल, जासुस अँगालोमा हालेको याद आयो मलाई !
खरानी बेच्न घर बालेको याद आयो मलाई
कात्रोमा खल्ती हालेको याद आयो मलाई !
भ्रष्टाचार गर्न दिन्न भन्दै कोरोना कालमा
कमिशनका बोरा उचालेको याद आयो मलाई !
च्यातेर साथीभाइ बनाएर पुछ्ने टालो
जुत्ता पुछेर फालेको याद आयो मलाई !
उध्याएर प्रतिगमनको तरबार मध्यरातमा
खसीझैं संसद ढालेको याद आयो मलाई !
देखाउँदै मिति गुज्रेको जेलमा बसेको लाइसन
व्यवस्थै खान थालेको याद आयो मलाई !
टाँगेर निधारमा राष्ट्रियताको रातो तुल
जासुस अँगालोमा हालेको याद आयो मलाई !!
अर्जुन पराजुली ।
