सत्तारुढ पाँच दलीय गठबन्धन आगामी निर्वाचनसम्म जान्छः प्रधानमन्त्री
काठमाडौँ । प्रधानमन्त्री शेरबहादुर देउवाले सत्तारुढ पाँच दलीय गठबन्धन आगामी निर्वाचनसम्म जाने बताएका छन् । ग्लास्गोमा जारी जलवायु परिवर्तनसम्बन्धी सम्मेलनमा सहभागी भएर फर्कने क्रममा बिहीबार बिहान त्रिभुवन अन्तर्राष्ट्रिय विमानस्थलमा आयोजित पत्रकार सम्मेलनमा प्रधानमन्त्री देउवाले गठबन्धन पूरै समय टिक्ने बताएका हुन् ।
उनले गठबन्धनप्रति कुनै शंका नगर्न आग्रह गरे । प्रधानमन्त्रीले सम्मेलनको क्रममा धेरै देशका सरकार तथा राष्ट्र प्रमुखहरुसँग विभिन्न विषयमा कुराकानी गरेको र नेपालप्रति छिमेकी भारतको सदभाव देखिएको जानकारी दिए ।
प्रधानमन्त्रीले भारतीय प्रधानमन्त्री मोदीलाई आफूले नेपाल आउन निमन्त्रणा दिएको र जवाफमा उनले आउने बताएको जानकारी दिए । उनले भने,‘मोदीले नेपाल भ्रमण आउँछु भन्नुभएको छ । उहाँले पनि मलाई दिल्ली बोलाउनुभएको छ। तर भ्रमण मिति तय भएको छैन।’ त्यस्तै ब्रिटिस सेनामा गोर्खाहरूको समस्या समाधानका लागि बेलायत सरकार सकारात्मक रहेको उनले बताए ।
