एक्वेडरको कारागारमा भएको झडपमा एकसय भन्दा बढीको मृत्यु
एक्वेडरको कारागारमा भएको झडपमा परी एकसय भन्दा बढीको मृत्यु भएको छ । त्यहाँ बन्दी गृहका दुई समूहबीच झडप भएको थियो । मङ्गलवार ग्वायाकइल सहरस्थित जेलमा भएको झडपमा कम्तीमा पाँच जना बन्दीको टाउको काटिएको जनाइएको छ ।
अन्यको गोली प्रहार गरेर हत्या गरिएको थियो । एकजना प्रहरी कमान्डर फास्तो बुएनानोका अनुसार बन्दीहरूले ग्रेनेड समेत फ्याकेका थिए । स्थिति नियन्त्रणमा लिन ४०० प्रहरी अधिकारी परिचालन गर्नुपरेको थियो ।
उक्त जेलमा विश्वव्यापी सञ्जाल रहेको एउटा लागु औषध गिरोहका सदस्यहरूलाई राखिएको थियो। । स्थानीय सञ्चारमाध्यमहरूका अनुसार कारागारभित्र त्यस्तो गराउनका लागि शक्तिशाली मेक्सिकन लागुऔषध तस्करहरूको गिरोहले निर्देशन दिएको थियो ।
उक्त गिरोहले हाल एक्वेडरमा काम गरिरहेको बताइएको छ । एक्वेडरको बन्दी गृहहरू हेर्ने एक जना निर्देशकले स्थानीय रेडियोसँगको कुराकानीमा त्यहाँको अवस्था डरलाग्दो भएको बताए ।
त्यहाँ गत फेब्रुअरीमा भएको झडपमा ७९ बन्दी मारिएका थिए । प्रहरी अधिकारीका अनुसार एउटा भवनमा रहेका बन्दीहरूले अर्को भवनसम्म पुग्न घिस्रिएर सानो सुरुङ हुँदै अघि बढेका थिए ।
त्यसपछि उनीहरूले विपक्षी समूहका सदस्यमाथि आक्रमण गरे । घटनमा ५० भन्दा बढी कैदीहरू घाइते भएका छन् । राष्ट्रपति गीएर्मो लास्सोले देशभरका कारागारहरूमा आपतकालिन अवस्थाको घोषणा गरेका छन्।
