पार्टी दर्ताका लागि हस्ताक्षर सनाखत गर्न नेकपा(एकीकृत समाजवादी)का नेताहरु निर्वाचन आयोगमा
काठमाडौं । नयाँ दल दर्ताका लागि हस्ताक्षर सनाखत गर्न प्रस्तावित नेकपा (एकीकृत समाजवादी) पार्टीका अध्यक्ष माधवकुमार नेपालसहित नेताहरु निर्वाचन आयोग पुगेका छन् । दुई दिनदेखि चन्द्रागिरीमा बसेका नेताहरू पर्यटक बस चढेर निर्वाचन आयोग पुगेका हुन् ।
नेपालसँगै रामकुमारी झाँक्री, प्रेम आले, विरोध खतिवडा, मेटमणि चौधरी लगायतका सांसदहरू पनि निर्वाचन आयोग पुगेका छन् । निर्वाचन आयोगले दिएको समय अनुसार नेताहरू दल दर्ताका लागि सनाखत गर्न बिहान ११ बजेपछि आयोग पुगेका हुन् ।
आयोगले सनाखतका लागि बिहान ११ देखि २ बजेसम्मको समय दिएको छ । नेकपा एमालेबाट विभाजन भएर नेकपा एकीकृत समाजवादी पार्टी र जसपाबाट विभाजन भएर लोकतान्त्रिक समाजवादी पार्टी गठन भएका थिए ।
दुवै दललाई आज आयोगले सनाखतका लागि बोलाएको हो । माधव नेपाल अध्यक्ष रहेको नेकपा समाजवादी र महन्थ ठाकुर अध्यक्ष रहेको लोकतान्त्रिक समाजवादी पार्टीले भदौ २ गते दल दर्ताका लागि निवेदन दिएका थिए ।
