एमाले २०७५ साल २ जेठमा फर्कियो, नेताहरुलाई अगाडिको अवस्थामा क्रियाशील हुन निर्देशन
काठमाडौं । नेकपा एमालेले दश बुँदे सहमति कार्यान्वयन गर्ने निर्णय गरेको छ । मंगलबार बसेको एमाले स्थायी कमिटी बैठकले दश बुँदे सहमति कार्यान्वयन गर्ने निर्णय गरेको हो ।
जसअनुसार पार्टी संरचना २०७५ साल २ जेठ गते अगाडिको अवस्थामा क्रियाशील हुने प्रवक्ता प्रदीप ज्ञवालीको भनाइ छ । त्यस्तै बैठकले १० प्रतिशत केन्द्रीय सदस्य मनोनयन, विभागहरुको पूर्णता दिने लगायत प्रयोजनका निम्ति सात सदस्यीय कार्यदल गठन गरेको छ ।
कार्यदलमा उपाध्यक्ष भीम रावल, महासचिव ईश्वर पोखरेल, उपमहासचिवहरु विष्णुप्रसाद पौडेल र घनश्याम भुसाल, स्थायी कमिटी सदस्य सुरेन्द्र पाण्डे र लेखराज भट्ट रहेका छन् ।
त्यस्तै बैठकले मंसिर १०देखि १२ सम्म दशौं महाधिवेशन र ४ देखि ६ असोजमा विधान महाधिवेशन गर्ने निर्णय गरेको छ । बैठकले भदौ १६ देखि २० गतेसम्म जिल्ला र जनसंगठनहरुको भेला गर्ने पनि एमालेले निर्णय गरेको छ ।
बैठकले पार्टी विभाजनमा गएका माधव नेपाल लगायतका नेताहरूलाई पार्टीमा फर्किन आह्वान गरेको छ । बुधबार पार्टी विभाजनका लागि औपचारिक रुपमा निर्वाचन आयोगमा सनाखत गर्नका लागि जाने तयारीमा रहेका नेताहरूलाई पार्टीमा फर्किन आह्वान गरेको हो । प्रवक्ता ज्ञवालीले भने, ‘दल दर्ताको प्रक्रियाबाट अलग रहनुहोस् । विभाजनका सबै गतिविधि परित्याग गरेर आउनेलाई कुनै कारबाही र भेदभाव राखिने छैन ।’
