दल विभाजन गर्ने अध्यादेश ल्याउन लागेको भन्दै ओलीले बोलाए स्थायी कमिटी र संसदीय दलको बैठक
काठमाडौं । नेकपा एमालेका अध्यक्ष केपी शर्मा ओलीले स्थायी कमिटी र संसदीय दलको बैठक बोलाएका छन् । अध्यक्ष ओलीले आज बिहान ११ बजे स्थायी कमिटी बैठक बोलाएका छन् भने त्यसलगत्तै संसदीय दलको बैठक बोलाएका छन् । संसदीय दलको बैठक दिउसो २ बजे संसद् भवन नयाँ बानेश्वरमा बोलाएको एमाले संसदीय दलका प्रमुख सचेतक विशाल भट्टराईले जानकारी दिए ।
दुवै बैठक पछिल्लो विकसित राजनीतिक घटनाकाबारेमा छलफल गर्न बोलाएको बोलाइएको उनले बताए । सरकारले सङ्घीय संसद्का दुवै अधिवेशन अन्त्य गरेपछि एमाले अध्यक्ष ओलीले हिजो राति नै आफ्नो निवास बालकोटमा केही स्थायी समिति सदस्य र केन्द्रीय सदस्यहरूसँग छलफल गरेका थिए ।
नेताहरुसँगको छलफलपछि राति नै अध्यक्ष ओलीले वक्तव्य जारी गरी राजनीतिक दल विभाजन गर्ने उद्देश्यले अध्यादेश ल्याउन खोजिएको भन्दै त्यसको विरोध गर्न अपील गरेका थिए । उनले पार्टी विभाजनकाविरुद्ध उभिन सांसद तथा नेता कार्यकर्तालाई आग्रह गरेका छन् ।
