ओलीमा राजा ज्ञानेन्द्रको दोस्रो अवतारः वरिष्ठ नेता नेपाल
झापा । नेपाल कम्यूनिस्ट पार्टी एमालेका वरिष्ठ नेता माधवकुमार नेपालले प्रधानमन्त्री तथा पार्टी अध्यक्ष केपी शर्मा ओलीले झुटको खेती गरी भ्रम सिर्जना गरेको आरोप लगाएका छन् । उनले अब पार्टीमा नयाँ पुस्तालाई आकर्षित गर्न सत्यतथ्य र विधिमा आधारित राजनीतिक प्रशिक्षण दिन जरुरी भएको बताएका हुन् ।
बिर्तामोडमा शुक्रबार जिल्ला कमिटी गठन गर्न आयोजित कार्यकर्ता भेलालाई सम्बोधन गर्दै नेपालले अध्यक्ष ओलीले निष्काशन गरेका र नसमेटेकालाई बटुलेर आफूले ७७ वटै जिल्लामा कमिटी बनाउन बाध्य भएको जिकिर गरे ।
नेपालले आफूसँग असहमत हुने पार्टी नेता कार्यकर्ताको पत्तासाफ गर्ने निरकुंश र अवसरवादी चरित्र ओलीमा मौलाउँदै गएको आरोप लगाएका हुन् । उनले ओलीलाई राजा ज्ञानेन्द्रको दोस्रो अवतार भएको आरोपसमेत लगाए ।
कार्यक्रममा नेता घनश्याम भुसालले केपी ओलीले झापाली कम्युनिष्ट आन्दोलनमाथि गद्दारी गरेको आरोप लगाए । उनले केपी ओली चरम व्यक्तिवादी मानिस भएको भन्दै अब नेपाली आमाको कोखबाट यस्तो व्यक्तिको जन्म नहोस् भन्ने कामना गरे । ओलीको राष्ट्रवाद नक्कली भएको टिप्पणी गर्दै भुसालले ओली सत्ताका लागि जेसुकै गर्न पनि तयार हुने बताए ।
माधव नेपाल पक्षले बिर्तामोडमा कार्यकर्ता भेला गरेर वेदराज रेग्मीको अध्यक्षतामा ३५१ सदस्यीय समानान्तर जिल्ला कमिटी गठन गरेको छ । समितिको उपाध्यक्षमा चन्द्रा श्रेष्ठ, सचिवमा निलमणि बराल, सहसचिवमा मणि भण्डारीलाई चयन गरिएको छ ।
