पार्टीको आधिकारिकता विवाद छिटो निरुपण गर्न आयोगलाई प्रचण्ड–नेपाल समूहको आग्रह
काठमाडौं । नेकपाको प्रचण्ड–नेपाल समूहले पार्टी विवादको निरुपण छिटो गर्न निर्वाचन आयोगलाई आग्रह गरेको छ । अध्यक्षद्वय पुष्पकमल दाहाल ‘प्रचण्ड’ र माधव कुमार नेपालको पाँच पृष्ठ लामो पत्र लिएर राजेन्द्र पाण्डेसहितका नेताहरू आयोग पुगेर विवाद छिटो निरुपण गर्न आग्रह गरेका हुन् ।
प्रचण्ड र नेपाल अध्यक्ष भएको नेकपा नै आधिकारिक पार्टी भएकाले संविधान तथा कानून बमोजिम अविलम्ब विवाद निरुपण गरी पाउँ भन्दै आयोगलाई पत्र दिइएको हो ।
नेकपाको संसदीय दलका उपनेता सुवासचन्द्र नेम्वाङ, केन्द्रीय कमिटी सदस्य विशाल भट्टराई, महेश बस्नेत, कर्ण बहादुर थापा, सूर्य बहादुर थापा क्षेत्री, प्रभु शाह र शान्ता चौधरीलाई पार्टीले गरेको कारबाही समेत पत्रमा जानकारी गराइएको छ । उनीहरूले प्रमुख निर्वाचन आयुक्त दिनेशकुमार थपलियालाई भेटेका थिए । जवाफमा थपलियाले यस विषयमा आयोगले आइतबारदेखि छलफल थाल्ने बताएका पाण्डेले जानकारी दिए ।
