सहकार्यका लागि जसपाका नेतालाई प्रचण्ड-नेपाल समूहको प्रस्ताव
काठमाडौं । नेकपाको प्रचण्ड–नेपाल समूह र जनता समाजवादी पार्टीका नेताहरुबीच समसामयिक राजनीतिक विषयमा छलफल भएको छ ।
बिहीबार नेकपाको पार्टी कार्यालय पेरिसडाँडामा नेकपा अध्यक्षद्वय पुष्पकमल दाहाल प्रचण्ड, माधवकुमार नेपाल र जनता समाजवादी पार्टी, नेपालका अध्यक्ष महन्थ ठाकुर, वरिष्ठ नेता राजेन्द्र महतो र नेता राजेन्द्र श्रेष्ठबीच छलफल भएको हो ।
छलफलमा आगामी दिनमा सहकार्य गरेर जानका लागि प्रचण्ड–नेपाल समूहले प्रस्ताव गरेको जनता समाजवादी पार्टीका नेता महतोले जानकारी दिए । छलफलमा जसपा नेताहरुले प्रचण्ड–नेपाल समूहको पार्टी कुन हो स्पष्ट पार्न आग्रह गरेका थिए । आफूहरुले नेकपाको प्रस्ताव पार्टीको बैठकमा छलफल गर्ने बताएको महतोले जानकारी दिए ।
जसपाका नेताहरुले पटक पटक आफूहरुले गरेको सहमतिमा धोका खाएको पनि स्मरण गराएका थिए । जसपा नेताहरुले आफ्नो पार्टीका सांसद रेशम चौधरी लगायतका नेताहरु अझैपनि बन्दी जीवन बिताउनुपरेको भन्दै बन्दी रिहाईका लागि संघर्ष गरिरहने बताए ।
सर्वोच्च आदालतले प्रतिनिधिसभा पुनःस्थापनाको फैसला सुनाएसँगै सत्ता समीकरणका लागि प्रचण्ड–नेपाल समूहले राजनीतिक भेटघाटलाई तिव्रता बनाएको छ । बुधबार प्रचण्ड–नेपाल समूहले कांग्रेस सभापति शेरबहादुर देउवासँग भेट गरेको थियो ।
