अब निरंकुशताको टाउकोमै हान्ने गरी आन्दोलन : प्रचण्ड
काठमाडौं । नेकपाको प्रचण्ड-नेपाल समूहका अध्यक्ष पुष्पकमल दाहाल प्रचण्डले निरंकुशताको टाउकोमै हान्नुपर्ने अवस्थाको आन्दोलन घोषणा गर्न लागिएको बताएका छन् ।
पार्टी केन्द्रीय कार्यालय पेरिसडाँडामा सोमबार आयोजित कार्यक्रममा अध्यक्ष प्रचण्डले यसअघिको काठमाडौं केन्द्रित कार्यक्रमले राम्रो सन्देश गएकाले काठमाडौं केन्द्रित निर्णायक आन्दोलन गर्ने बताएका हुन् । उनले भने, ‘अस्तिको प्रदर्शनले जनताले छाड्नेवाला छैनन् भन्ने सन्देश गएको छ । गडबड गर्नु हुन्न भन्ने सन्देश गएको छ । सकारात्मक निर्णय आउने बेलामा अबको कार्यक्रमलाई राष्ट्रलाई झल्कने किसिमले गर्नुपर्छ ।’
उनले काठमाडौं बाहिर गरेर परिणाम नआउने बताए । उनले भने, ‘काठमाडौंमा फेरि ठूलो सभा गर्ने हो । टाउकोमै हान्नुपर्छ अन्त हानेर केही हुन्न भनेर काठमाडौंमा ठूलो प्रदर्शन गर्न लागेका हौं ।’ उनले सामन्ती एजेण्टहरुले गणतन्त्र उल्टाउने दुस्साहसलाई जनताले परास्त गरिछाड्ने बताए । उनले तानाशाहहरु कसरी सकिन्छन् भन्ने विश्वका धेरै उदाहरण रहेका भन्दे यसलाई सफल हुन नदिने बताए । उनले अब हुने विरोध प्रदर्शनमा प्रदेश दुईबाट २५ हजार जनता काठमाडौंमा उतार्न प्रदेश दुईका नेताहरुलाई आग्रह गरे ।