दीप बस्न्यातविरुद्ध बोल्दै हुनुहुन्छ भने एकछिन आँखा बन्द गरेर आफ्नो मन र विवेकलाई सोध्नुहोला
नारायण गाउँले ।
दीप बस्न्यातविरुद्ध बोल्दै हुनुहुन्छ भने एकछिन आँखा बन्द गरेर आफ्नो मन र विवेकलाई सोध्नुहोला, एउटा मन्त्रालयको सचिवले मन्त्रीदेखि अन्य कर्मचारीलाई छलेर एक खर्ब कमाउन सक्ने भन्ने त हुँदैन । दह्रो राजनैतिक पहुँच, सिस्टमकै सेटिङ् र मिलोमतो नभई यति ठूलो भ्रष्टाचार व्यक्ति एक्लैले गर्न सक्ने कुरो भएन ।
दीप बस्न्यातसँग गृहमन्त्रीदेखि उपराष्ट्रपतिसम्मका छोराहरू करोडौंका बिजनेस पार्टर रहेको भन्ने त पढ्नुसुन्नुभएकै होला ।
अहिले दीप बस्न्यात अदालतमा तानिएको बालुवाटारको जग्गा प्रकरणमा हो । त्यो जग्गामा उनीसँग अर्थमन्त्री विष्णु पौडेलका छोराको ‘पार्टनरशिप’ बारे पनि पढ्नुभएकै होला । पौडेलले त झुक्किएर किनेको भन्ने लागेको भए तपाईंलाई भनिदिउँ, उनले अन्यसँग नभई आफ्नै मित्र एवं नेकपा नेता शोभाकान्त ढकालमार्फ़त उक्त जग्गाको कारोबार गरेको त स्पष्टै छ । ढकाललाई सरकारी छानबिन आयोगले मुख्य माफिया भनेर तोकेकै छ । बस्न्यात त्यही नेक्ससका एक पात्र मात्र हुन् ।
सचिव या राजदूत बन्नका लागि कति धरौटी र शेयर कसलाई चढाउनुपर्छ होला भन्ने जिज्ञासाको पनि जबाफ ढिलो चाँडो मिल्छ नै ।
जबसम्म नेताको खराउ मण्डपमा राखेर पुज्ने रहर रहिरहन्छ, त्यतिन्जेल बस्न्यातहरूलाई गाली गर्ने कहर नउठाउनु नै बेश हुन्छ । कपाल खौरेर फोक्सोमा लागेको रोग कसरी निको हुन्छ र ?
