थप २,२२५ जनामा कोरोना संक्रमण,२,८४६ जना संक्रमणमुक्त
नेपालमा पछिल्लो २४ घन्टामा थप २ हजार २ सय २५ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
मन्त्रालयका अनुसार पछिल्लो २४ घण्टामा देशभरका प्रयोगशालामा १३ हजार आठ सय ४६ जनाको पीसीआर परीक्षण गर्दा २ हजार २ सय २५ जनामा कोरोना भाइरस संक्रमण पुष्टि भएको हो । पछिल्लो २४ घण्टामा काठमाडौँ उपत्यकामा मात्र १ हजार १ सय १० सङ्क्रमित थपिएका छन् । जसमध्ये ४ सय २९ महिला र ६ सय ८१ पुरुष रहेका छन् । योसँगै संक्रमितको कुल संख्या एक लाख ५५ हजार दुई सय ३३ पुगेको छ ।
यस्तै पछिल्लो २४ घण्टामा दुई हजार आठ सय ४६ जना कोरोना सङ्क्रमणमुक्त भएसँगै कोरोनाबाट संक्रमणमुक्त हुनेको सङ्ख्या एक लाख आठ हजार तीन सय ३४ पुगेको छ । अब नेपालमा ४६ हजार ५७ जना सक्रिय सङ्क्रमित रहेका छन् । यस्तै शनिबार १३ जनाको मृत्युभएसँगै कोरोना संक्रमणका कारण मृत्यु हुनेको सङ्ख्या आठ सय ४२ पुगेको मन्त्रालयले जनाएको छ ।
