थप ३४३९ जनामा कोरोना संक्रमण, ११२६ जना डिस्चार्ज
काठमाडौं । नेपालमा पछिल्लो २४ घण्टामा अहिलेसम्मकै धेरै ३४३९ जनामा कोरोना संक्रमण पुष्टि भएको छ । स्वास्थ्य मन्त्रालयका अनुसार देशका विभिन्न प्रयोगशालामा गरिएको परीक्षणमा थप ३४३९ जनामा संक्रमण पुष्टि भएको हो ।
काठमाडौंमा १२९६, भक्तपुरमा ९५ र ललितपुरमा २९३ जनामा संक्रमण पुष्टि भएको छ । पछिल्लो २४ घण्टामा पाँच महिला र १० पुरुष गरी थप १५ जनाको मृत्यु भएको छ । योसँगै कोरोना संक्रमणबाट मृत्यु हुनेको संख्या ५७८ पुगेको छ ।
पीसीआर विधिबाट १४,२०९ जनाको नमुना परीक्षण गरिएको छ । क्वारेन्टाइनमा ४१६४ जना रहेका छन् । आइसोलेसनमा २५,००७ जना सक्रिय संक्रमित रहेका छन् । बुधबार थप ११२६ जना डिस्चार्ज भएका छन् । योसँगै डिस्चार्ज हुनेको संख्या ६८,६६८ पुगेको मन्त्रालयले जनाएको छ । आइसियूमा २३३ र भेन्टिलेटरमा ३७ जनाको उपचार भइरहेको छ ।
