मन्त्रालयहरु फुटाएर मन्त्री पद बाँड्ने गैरजिम्मेवार प्रवृत्ति रोक्न वरिष्ठ नेता पौडेलको चेतावनी
काठमाडौं । नेपाली कांग्रेसका वरिष्ठ नेता रामचन्द्र पौडेलले प्रधानमन्त्रीले आफ्नो सुविधाका लागि मन्त्रालय फुटाउन लागेको भन्दै आपत्ति प्रकट गरेका छन् ।
सामाजिक संजाल फेसबुकमार्फत पौडेलले मन्त्री पद बाड्ने गैर जिम्मेवार प्रवृत्तिलाई नयाँ संविधानले अन्त्य गरेपनि फेरि कम्युनिष्ट सरकारले संविधान विपरीत काम गर्न लागेको भन्दै आपत्ति जनाएका हुन् ।
उनले जनतालाई सर्वसुलभ स्वास्थ्य सुविधा दिन नसकिरहेको अवस्थामा फेरि मन्त्रालय बढाउने काम गरेमा त्यसको बिरोधमा आफूहरु उत्रिन बाध्य हुने चेतावनीसमेत दिएका छन् ।
उनले लेखेका छन्, ‘देशलाई भारमात्र पर्नेगरी प्रधानमन्त्रीले आफ्नो सुविधाको लागि मन्त्रालयहरु फुटाएर मन्त्रालय थप्ने, मन्त्री पद बाँड्ने गैरजिम्मेवार प्रवृत्तिलाई नयाँ संविधानले अन्त गर्न खोजेको हो । देश विकास गर्ने सारा बजेटलाई अनावश्यक भर्तीकेन्द्र खोली बिना दरबन्दी जतासुकै मनपर्दी ढंगले मान्छे भर्ने काम कम्युनिष्टले चलाएका छन् । कर्मचारीको पेन्सन धान्न नसक्ने भैसकेको अवस्था छ । जनतालाई सर्बसुलभ स्वास्थ्य सुबिधा दिन नसकिरहेको अवस्थामा फेरि मन्त्रालय बढाउने काम गरियो भने त्यसको घोर बिरोधमा हामी उत्रने छौं ।’
