‘केन्द्र सरकार जिम्मेवार बन्न नसक्दा उपत्यकामा कोरोना संक्रमित बढे’
भक्तपुर । उपत्यका नगरपालिका मेयर फोरमका सचिव मदनसुन्दर श्रेष्ठले उपत्यकामा कोरोना नियन्त्रण गर्न केन्द्र सरकार जिम्मेवारी बन्न नसकेको आरोप लगाएका छन् । रफत सञ्चार क्लबले आइतबार भक्तपुुरमा आयोजना गरेको साक्षात्कारमा उनले सरकारकै लापरवाहीका कारण देशभरको संक्रमितको संख्याको आधा संख्या उपत्यकामा देखिएको बताए ।
उपत्यकामा अब लकडाउन नहुने बताउँदै श्रेष्ठले संक्रिय संक्रमितको क्षेत्रको पहिचान गरि फरक खालको निषेधाज्ञा लगाउनुपर्ने उल्लेख गरे । उपत्यकाका तीनै जिल्लाका प्रमुख जिल्ला अधिकारीहरुको निषेधाज्ञा कागजमै सीमित बन्दा उपत्यकामा महामारी फैलिएको उनले बताए ।
उनले कन्ट्याक्ट टेसिङ प्रभावकारी रुपमा हुन नसक्दा संक्रमितको संख्या बढेको आरोप पनि लगाए । फरक प्रसंगमा उनले उपत्यका विकास प्राधिकरण निश्चित व्यक्तिको आर्थिक चँगुलमा फसेको र उपत्यका नगरपालिकाले बिघटनको आवाज उठाउँदै आएको धारणा राखे ।
