विश्वमा कोरोना सङ्क्रमितमध्ये २ करोड ३१ लाख भन्दाबढी संक्रमणमुक्त
विश्वभर महामारीको रुपमा फैलिएको कोरोना भाइरस सङ्क्रमितमध्ये २ करोड ३१ लाख भन्दाबढी उपचार पछि निको भएर घर फर्किएका छन् । विश्वका २ सय १६ देशमा फैलिएको कोरोना सङ्क्रमितमध्ये २ करोड ३१ लाख १० हजार भन्दाबढी उपचार पछि निको भएर घर फर्किएका हुन् ।
एकै दिन २ लाख ७० हजार ६१९ मानिस कोरोना संक्रमणमुक्त भएका छन् । निको हुनेको यो संख्या कुल संक्रमितको ७३ प्रतिशत बढी हो । चीनको वुहानमा गत वर्षको डिसेम्बर अन्तिममा देखिएको भाईरसबाट हाल विश्वका ३ करोड १४ लाख ८२ हजार २ सय भन्दाबढी संक्रमित भएका छन् । पछिल्लो २४ घण्टामा २ लाख २६ हजार ८ सय भन्दा बढीमा संक्रमण पुष्टि भएको छ भने ४ हजार २८ जनाको मृत्यु भएको छ ।
कोरोना संक्रमणका कारण विश्वभर मृत्यु हुनेको संख्या ९ लाख ६९ हजार २ सय ९६ पुगेको वल्डोमिटरमा उल्लेख छ । संक्रमितमध्ये ७४ लाख २ हजार ८ सयभन्दाबढी विभिन्न अस्पतालमा उपचाररत छन् भने ६१ हजार ८ सय बढीको अवस्था गम्भीर रहेको छ । यस्तै, कोरोनाबाट सबैभन्दा बढी प्रभावित अमेरिकामा ७० लाख ७६ हजार २ सय भन्दाबढी सङ्क्रमित भएका छन् ।
संक्रमितमध्ये ४२ लाख ९९ हजार ५ सय भन्दाबढी निको भएका छन् भने २ लाख ४ हजार ५ सय बढीको ज्यान गएको छ । यसैगरी छिमेकी मुलुक भारतमा पछिल्लो २४ घण्टामा ७४ हजारभन्दा बढीमा संक्रमण पुष्टि भएसँगै संक्रमितको संख्या ५५ लाख ६० हजार १०५ पुगेको छ ।
संक्रमितमध्ये अहिलेसम्म ४४ लाख ९४ हजार ७२० जना संक्रमणमुक्त भएका छन् भने १० लाख ७६ हजार ४२० जनाको Qउपचार भइरहेको छ । कोरोना संक्रमणका कारण मृत्यु हुनेको संख्या ८८ हजार ९६५ रहेको छ । ब्राजिलमा कोरोना भाइरसबाट सङ्क्रमित हुनेको संख्या ४५ लाख ६० हजार ८३ पुगेको छ भने १ लाख ३७ हजार ३ सय बढीको मृत्यु भएको छ । संक्रमितमध्ये ३८ लाख ८७ हजार भन्दा बढी निको भएका छन् ।
