गणतन्त्रका सूत्रधारहरुनै गणतन्त्र स्मारकमा अनुपस्थित
काठमाडौं । संविधान दिवसका अवसरमा नारायणहिटी दरबार संग्रहालय परिसरमा रहेको गणतन्त्र स्मारकमा माल्यार्पण गरिएको छ । शनिबार नेकपाका नेता सुवास नेम्वाङ, पर्यटनमन्त्री यागेश भट्टराई लगायतले गणतन्त्र स्मारकमा माल्यार्पण गरेका हुन् । त्यसक्रममा नेकपाका अन्य नेताहरुको पनि सहभागीता थियो ।
उक्त स्थानमा गणतन्त्र स्थापनाका लागि ज्यान गुमाएकाहरु, अंगभंग भएकाहरु र बेपत्ता भएकाहरुको सम्झानामा स्मारक बनाइएको छ । माल्यार्पणपछि उनीहरुले गणतन्त्र स्मारक पार्कको अवलोकन पनि गरेका थिए ।
जनआन्दोलनको प्रतीक, राजतन्त्रको बहिर्गमन र गणतन्त्रको आगमनको प्रतीकका रुपमा गणतन्त्र स्मारक निर्माण गरिएको थियो । उक्त स्मारक पार्कसहित पैँतीस रोपनी क्षेत्रफलमा फैलिएको छ । प्रधानमन्त्री केपी शर्मा ओली तथा नेकपाका अध्यक्ष पुष्पकमल दाहाल प्रचण्ड भने स्मारकमा गएनन् ।