पुजारीले यसरी लगे रातो मच्छिन्द्रनाथको मुर्तिलाई बुङ्मती
ललितपुर । वर्षा र सहकालका देवता’ रातो मच्छिन्द्रनाथलाई ललितपुरको बुङमती लगिएको छ । सोमबार आठ जना पुजारीले रातो मच्छिन्द्रनाथको मुर्तिलाई खटमा राखेर बुङमती लगेका हुन् । चारैतिर नाका बन्द गरेर प्रहरीले सुरक्षा दिएपछि अगाडि पछाडि विभिन्न थरीका बाजासहित लगिएको थियो ।
कोरोना महामारीका कारण यस वर्ष नरिवल खसाल्ने, जाउलाखेलमा पुर्याएर भोटो देखाउन र रथ तानेर पाटनका विभिन्न ठाउँ पुर्याउने परम्परा भने रोकिएको छ । रातो मच्छिन्द्रनाथलाई बुङ्मती पुर्याएको चार दिनमा विशेष पूजाआजा गरी जात्रा पर्व समाप्त गरिने तय भएको छ ।
वैशाख शुक्लपक्षको शुभसाइतमा निकाल्नुपर्ने रथ यात्रा यस वर्ष कोभिड– १९ महामारीका कारण रोकिएको थियो । लामो समय रथ तान्ने विषयमा केही निर्णय हुन नसकेपछि भदौ १८ गते स्थानीय केही युवाहरूले प्रशासनको अनुमति बिना रथ तानेका थिए । सोही क्रममा प्रहरी र युवाबीच झडप भएको थियो । युवाहरूले रथ राखिएको ठाउँबाट तानेर केही पर पुर्याएका थिए । त्यसपछि स्थानीय ज्यापु समाजले क्षमा पूजा गरी रथ तानेर सोह्रखुट्टे पाटीसम्म पुर्याएका थिए ।
