ओम्नी समूह कालोसूचीमा, एक वर्षसम्म खरिदमा सहभागी हुन नपाउने
काठमाडौं । स्वास्थ्य सामग्री खरिद अनियमितता प्रकरणमा मुछिएको ओबीसीआई प्रालि (ओम्नी समूह) कालोसूचीमा परेको छ । सार्वजनिक खरिद अनुगमनको कार्यालयले सूचना प्रकाशित गरी ओम्नीलाई एक वर्षसम्म अन्य खरिद प्रक्रियामा सहभागी हुन नपाउने गरी कालोसूचीमा राखेको हो ।
सार्वजनिक खरिद अनुगमनको कार्यालयले स्वास्थ्य सेवा विभागको सिफारिसमा सोमबारबाट लागू हुने गरी ओम्नीलाई कालोसूचीमा राखेको जानकारी दिएको छ । स्वास्थ्य सेवा विभागले गत चैत १९ गते ओम्नीसँग भएको उपकरण खरिद सम्झौता रद्द गर्ने निर्णय गरेको थियो ।
ओम्नीसँगको खरिद प्रक्रियामा अनियमितता भएको भन्दै सर्वत्र विरोध भएपछि सरकारले जीटूजीमार्फत औषधि खरिद गर्ने जिम्मा नेपाली सेनालाई दिएको थियो । कोरोना महामारीसँग जुध्न स्वास्थ्य सामग्री खरिद गर्नेसम्बन्धी उक्त प्रक्रियाबारे संसद्को सार्वजनिक लेखा समितिले पनि अनुसन्धान गरिरहेको छ ।
