हेटौंडा र चितवनमा गरी कोरोना संक्रमणबाट थप दुई जनाको मृत्यु
हेटौंडा । मकवानपुरको हेटौंडा उपमहानगरपालिकामा कोरोना भाइरसको सङ्क्रमणबाट एक व्यक्तिको मृत्यु भएको छ । मंगलबार राति हेटौंडा उपमहानगरपालिका–१ का ६१ वर्षीय वृद्धको मृत्यु भएको हेटौंडा–४ स्थित आइसोलेशन कक्षका इञ्चार्ज भोला चौलागाईले जानकारी दिएका छन् ।
किटजन्य रोग अनुसन्धान तथा तालिम केन्द्र हेटौंडामा रहेको कोरोना प्रयोगशालामा स्वाबको पीसीआर परीक्षण गर्दा मृत्यु भएका व्यक्तिमा कोरोना सङ्क्रमण भएको पुष्टि भएको छ । उनी लामो समयदेखि उच्च रक्तचाप र मिर्गौला रोगबाट पीडित थिए । कोरोना सङ्क्रमणबाट मकवानपुरमा पहिलोपटक एक जनाको मृत्यु भएको हो ।
त्यसैगरी, पूर्वी चितवनको खैरहनी नगरपालिका–३ गोठसोरमा एक वृद्धाको मृत्युपछि कोरोना पुष्टि भएको छ । एक सय आठ वर्षीया वृद्धाको सोमबार मृत्यु भएको स्वास्थ्य कार्यालय चितवनका प्रमुख दीपक तिवारीले जानकारी दिए । उनको मङ्गलबार मात्रै पीसीआरको रिपोर्ट आएको हो । नतिजामा कोरोना सङ्क्रमण देखिएको छ ।
साउन २४ गते क्यान्सर अस्पतालमा कार्यरत आफन्तले भेटघाट गरेर गएसँगै आफन्तको नमूना परीक्षणका क्रममा सङ्क्रमित देखिएपछि उनको स्वाब सङ्कलन गरिएको थियो । उनीसँगै उनको हेरचाह गर्ने चार जनामा पनि कोरोना पुष्टि भएको स्वास्थ्य कार्यालय चितवनले जनाएको छ । मृतक वृद्धाको शव नेपाली सेनाको टोलीले व्यवस्थापन गरेको छ ।
