कोरोना संक्रमणबाट विश्वमा ७ लाख ७७ हजार भन्दा बढीको मृत्यु
विश्वभर महामारीको रुपमा फैलिएको कोरोना भाइरस संक्रमणका कारण मृत्यु हुनेको संख्या ७ लाख ७७ हजार नाघेको छ ।
करिब सात महिनादेखि फैलिएको संक्रमणबाट विश्वका २ सय १६ देशका २ करोड २० लाख ४२ हजार १ सय २८ जना संक्रमित भएका छन् । पछिल्लो २४ घण्टामा १ लाख ९१ हजार ५ सय भन्दाबढी संक्रमित भएका थिए । यस्तै, संक्रमितमध्ये ७ लाख ७७ हजार २ सय १८ जनाको मृत्यु भएको छ। पछिल्लो २४ घण्टामा ४ हजार भन्दाबढी मृत्यु भएका छन् ।
यस्तै, १ करोड ४७ लाख ८५ हजार ५ सय १४ उपचारपछि निको भएर घर फर्किएका छन् । संक्रमितमध्ये ६४ लाख ७९ हजार ३ सय ९६ जनाको विभिन्न अस्पतालमा उपचार भइरहेको छ भने ६२ हजार बढीको अवस्था गम्भिर रहेको वल्डोमिटरमा उल्लेख छ ।
कोरोनाको संक्रमणका कारण सबैभन्दा बढी प्रभावित अमेरिकामा संक्रमितको संख्या ५६ लाख १२ हजार नाघेको छ । कोरोनाका कारण १ लाख ७३ हजार ७ सयबढीको मृत्यु भएका छन् भने २९ लाख ७३ हजार ५ सय भन्दा बढी निको भएका छन् ।
यस्तै, ब्राजिलमा ३३ लाख ६३ हजार २ सय भन्दाबढी संक्रमित भएका छन् भने १ लाख ८ हजार ६ सय बढीको मृत्यु भएको छ । संक्रमितमध्ये २६ लाख ७८ हजार ४ सय भन्दाबढी निको भएका छन् ।
यसैगरी छिमेकी मुलुक भारतमा २७ लाख १ हजार ६ सय भन्दाबढी संक्रमित भएका छन् । संक्रमितमध्ये ५१ हजार ९ सय भन्दा बढीको मृत्यु भईसकेको छ भने १९ लाख ७६ हजार २ सय भन्दाबढी निको भएका छन् ।
यस्तै, नेपालमा २७ हजार २ सय ४१ सङ्क्रमित, १७ हजार ४ सय ९५ निको भएका, १ सय ७ जना सङ्क्रमणका कारण मृत्यु भएका र नौ हजार ६ सय ३९ सक्रिय सङ्क्रमित रहेका छन् ।
