‘कोरानो संक्रमित बढ्दै जाँदा बिरामीले बेड नै नपाउने अवस्था आउन सक्छ’
प्रमुख प्रतिपक्षी नेपाली कांग्रेसद्वारा गठित कोरोना अनुगमन समितिले महामारी नियन्त्रणमा काम गरिरहेका चिकित्सकहरुको अवस्थाबारे नेपाल चिकित्सक संघसँग छलफल गरेको छ ।
शुक्रबार पार्टीका सहमहामन्त्री प्रकाशशरण महतको संयोजकत्वमा गठित कोरोना अनुगमन समितिले शुक्रबार संघको कार्यालयमा पदाधिकारीहरुसँग छलफल गरेको हो ।
छलफल स्वास्थ्यकर्मीले भोगिरहेका समस्या र समाधानका विकल्पमा छलफल रहेको समितिले जनाएको छ । छलफलमा महतले महामारी नियन्त्रणमा पहिलो लाइनमा रही सेवा गरिरहेका चिकित्सकहरुको मनोबल उच्च राख्न सरकारले सेवा सुविधा उपलब्ध गराउनुपर्नेमा जोड दिएका थिए । उनले कोरोना संक्रमित बढ्दै गएको अवस्थामा पूर्वतयारीलाई तीव्र बनाउनुपर्ने पनि बताए ।
सरकार कोरोना रोकथामको पूर्वतयारीको सवालमा चुकेको भन्दै उनले अब बेलैमा सचेत नहुने हो भने भयावह अवस्था आउन सक्ने बताए ।
छलफलमा संघका अध्यक्ष डा.लोचन कार्कीले कोरानो संक्रमित बढ्दै जाँदा बिरामीले बेड नै नपाउने अवस्था आउन सक्ने बताए । उनले स्थानीय तहमा कोरोना बिरामीका लागि गरिएको पूर्वतयारी पर्याप्त नभएको बताए ।
सीमा नाका भएर आउनेहरुको स्वास्थ्य व्यवस्थापनको उचित प्रवन्ध गर्ने र परीक्षणको दायरा बढाउनुपर्ने, आईसोलेसन बेड, भेन्टिलेटरसहित कोभिड अस्पतालको संख्या बढाउनुपर्ने र बिरामी उपचारको ब्यवस्था यथाशीघ्र छिटो मिलाउनुपर्ने लगायतमा सरकारले बिशेष ध्यान दिनुपर्ने छलफलमा सहभागीहरुले बताएका थिए ।
