पर्सामा थप ७३ जनामा कोरोना संक्रमण पुष्टि
वीरगंज । पर्सामा थप ७३ जना नयाँ कोरोना संक्रमित फेला परेका छन् । वीरगन्जको नारायणी अस्पतालको प्रयोशालामा गरिएको पीसीआर परीक्षणबाट १५ जना महिला र ५८ जना पूरुषमा संक्रमण पुष्टि भएको हो ।
नारायणी अस्पतालको प्रयोगशालामा परीक्षण गर्दा १५ वर्ष देखि ७१ वर्ष उम्मेर समुहका ७३ जना कोरोना संक्रमित फेला परेका मेडिकल सुपरिटेन्डेन्ट डा. मदन उपाध्यायले जानकारी दिएका छन् । उनले फेला परेका मध्ये ३ जना बाराका र ७० जना पर्साका रहेका बताए ।
सबै भन्दा बढी वीरगन्ज महानगरपालिकाको वडा नम्बर ११ श्रीपुरबाट ४० जना संक्रमित फेला परेका छन् । श्रीपुरबाट १२ जना महिला र २८ जना पुरुषमा संक्रमित भेटिएको मेडिकल सुपरिटेन्डेन्ट उपाध्यायले जानकारी दिए ।
उनले गएराती आएको पीसीआर रिपोर्टमा पर्सा जिल्लाबाट दुई जना सुरक्षाकर्मी र एक जना संचारकर्मी समेत संक्रमण पुष्टि भएको बताए । वीरगंज महानगरपालिकाले सुरु गरेको मास टेस्टिङमा संकलन गरिएका स्वाबको नमुनाबाट अधिकांश संक्रमित फेला परेका अस्पतालले जनाएको छ ।
