उत्तर कोरियामा पनि देखियो कोरोना भाइरसको संक्रमण

उत्तर कोरियामा पनि कोरोना भाइरसको पहिलो संक्रमण देखिएको छ । उत्तर कोरियाको सरकारी समाचार एजेन्सी  कोरियन एजेन्सी सेन्ट्रल न्युज एजेन्सी (केसीएनए) ले उत्तर कोरियामा कोरोनाको पहिलो केस रिपोर्ट भएको जानकारी दिएको छ । देशमा कोरोनाको पहिलो केस देखिएपछि उत्तर कोरियाका नेता किम जोंग उनले आपतकालिन बैठक गरेको केसीएनएले जानकारी गराएको छ ।

रिपोर्टमा संक्रमित व्यक्ति जुलाई १९ मा दक्षिण कोरियाबाट काइसोङ शहर हुदै आएका थिए । उनीलाई अहिले आवश्यक उपचार गर्दै क्वारेन्टाइनमा राखिएको केसीएनएले बताएको छ । किमले अहिले आइसोलेसनका सबै उपाय अपनाउन निर्देशन दिदै काइसोङ शहर इलाकालाई सतर्क बनाएको बताइएको छ ।

केसीएनएले सेनाले अवैधानिक रुपमा संक्रमित उत्तर कोरिया आएको विषयमा छानबिन गर्ने जनाएको छ । यस अघि उत्तर कोरियामा कोरोना संक्रमित रहेको बताइएपनि संक्रमण भएको आधिकारिक पुष्टि भएको थिएन ।