यो ओलीको मात्र होइन, सिङ्गो देशको अपमान हो

नारायण गाउँले ।

चिनियाँ राजदूतका गतिविधिहरू सार्वभौम र स्वतन्त्र राष्ट्रका नागरिकको आँखामा बिझाउने खालका छन् । भारतीय राजदूतहरू त कहिल्यै पनि मर्यादामा बसेका छैनन् । पक्कै यो आफैमा दुःखद सत्य हो ।
तर भारतीय मिडियामा चिनियाँ राजदूत र हाम्रा प्रधानमन्त्रीलाई लिएर गरिएको घटिया टिप्पणी निन्दनीय छ । पत्रकारको हैसियतमा राजदूतका गैरकूटनैतिक चलखेलहरू प्रति व्यङ्ग्य गर्नुसम्म अलग हो तर यो त सोझै चारित्रिक हमलाका रूपमा आएको छ ।

भारतीय राजदूतलाई बोलाएर यसबारे परराष्ट्र मन्त्रालयले आपत्ति जनाउनु र मिडियालाई माफी माग्न लगाउनु जरूरी छ । यो ओलीको मात्र होइन, सिङ्गो देशको अपमान हो । भारत सरकार र भारतीय मिडिया एउटै होइनन्, जसरी कान्तिपुर या नयाँ पत्रिका नेपाल सरकार होइनन् । तर गलत तथ्य, घृणा र चरित्र हत्या गर्ने मिडियामाथि कारबाही गर्नु सम्बन्धित सरकारको दायित्व हो ।

एउटा पत्रकारले साभार गरेर माओले मास्क लगाएको फोटो छापेको भरमा चिनियाँ राजदूतले आपत्ति जनाएपछि जागीर नै गएको थियो । त्यो उदार र सभ्य देशमा सामान्य र पाच्य विषय थियो । तर भारतीय मिडियाले यसपल्ट सबै खाले हद पार गरेको छ । विश्वको कुनै पनि देशमा यस्तो गतिविधिलाई सामान्य मानिन्न । त्यहाँ हाम्रा पनि त राजदूत होलान् । एक अर्बभन्दा बढ़ी नागरिकमा हाम्रो देश र प्रधानमन्त्रीबारे घृणा फैल्याउने मिडिया स्टन्टप्रति उनले कड़ा र कूटनैतिक आपत्ति जनाए कि जनाएनन् ? “मलाई भारतले हटाउन खोज्यो, भारतको कोरोनाभाइरस चीनको भन्दा कड़ा रहेछ” जस्ता कूटनैतिक मर्यादा नाघेर हाम्रा प्रमले बोलेको हुनाले पनि यस्ता कुप्रचारको प्रतिवाद गर्न बेलाबखत समस्या हुन्छ । हाम्रो बोलीमा पनि संयम जरूरी छ ।

बोल्नुमात्रै राष्ट्रवाद होइन । यदि यसअघि गरिसकिएको छैन भने भोलि बिहानै भारतीय राजदूतलाई मन्त्रालय झिकाएर यस विषयमा कडा आपत्ति जनाइयोस् र आगामी दिनमा समेत यस्ता आधारहीन स्टन्ट नगर्न चेतावनी दिइयोस् ।