मुम्बईमा कोरोना संक्रमित एकै परिवारका आठ नेपाली कोरोनालाई जितेर घर फिर्ता
काठमाडौं । अछामको चैरपाटी घर भई भारतको मुम्बईमा बस्दै आएका एकै परिवारका आठ जना कोरोना संक्रमणबाट निको भएका छन् । अघिल्लो महिना कोरोनाभाइरसको सङ्क्रमण देखिएकोमा उनीहरु अस्पतालमा उपचारपछि निको भई डिस्चार्ज भएका हुन् ।
तीनवटा अलग अलग अस्पतालमा झण्डै साढे तीन साताको उपचारपछि निको भएका उनीहरू हाल दक्षिण मुम्बईको आफ्नो घरमा आराम गरिरहेका छन् । मुम्बईका ट्रमा, कस्तुरवा र पी. डब्लू अस्पतालमा उनका परिवारका सदस्यहरूको उपचार गरिएको थियो । उनीहरू २२ देखि २५ दिनसम्म अस्पतालमा बसेका थिए ।
परिवारका सदस्यहरूलाई अलग अलग राखेकाले एक अर्काको स्वास्थ्यलाई लिएर परिवारका सदस्यहरूमा चिन्ता देखिएको घरमूली बताउँछन् । तर उनले रोग लागेपछिको अवस्थामा पनि आत्मबल बलियो बनाएकाले कोरोनाभाइरसबाट आफ्नो परिवारले पार पाएको बताएका छन् ।
बीबीसी नेपालीबाट
