यत्रो जेल बसेका नेता हुँदाहुँदै सङ्क्रामक रोगबारे बोल्नु डाक्टरको गम्भीर अपराध हो, जेलमा कोचिहाल सरकार !
नारायण गाउँले ।
स्वास्थ्य मन्त्रीलाई महामारी शुरू भएको दुई महिनासम्म पिपिई के हो भन्ने थाहा छैन । उच्चस्तरीय समितिमा एक जना विज्ञ पनि छैन । समितिका संयोजक डाक्टरले भनेको कुरा बुझ्दैनन् । विभागीय प्रमुखहरू सेनालाई पर्दामा देखाएर व्यापारीसँग साँठगाँठ गरिरहन्छन् । अन्त कतै मान्यता नपाएको आरटीडी परीक्षणको नाममा समय र साधनस्रोतको खर्च भइरहेछ । सरकारको ध्यान अकल्पनीय रूपमा सरूवा, बढुवा र नियुक्तिमा देखिन्छ । सरकारी माइकमा बोल्नेहरू कोही पनि विज्ञ छैनन् । सम्बोधन गर्ने कोटिका छन् ।
यस्तो बेला एउटा डाक्टरले आफ्नो विज्ञता, अनुभव र विवेकका आधारमा एकदुई वटा अन्तर्वार्ता दिनु पनि सरकारलाई गिज्याउनुजस्तो लाग्दो रहेछ । जेल बसेका यत्रा नेताहरू हुँदाहुँदै सङ्क्रामक रोगबारे एउटा नाथे डाक्टरले बोल्नु र जनताले नेताभन्दा उसलाई बढ़ी पत्याउनु गम्भीर अपराध हो । जेलमा कोचिहाल सरकार !
