नेपालमा कोरोना संक्रमितको संख्या ६ पुग्यो
काठमाडौँ । नेपालमा फेरि एक जनामा कोरोना भाइरसको संक्रमण देखिएको छ । चैत ४ गते कतारको दोहाबाट कतार एयरवेजको फ्लाइट नम्बर क्युआर ६५२ मा आएका एक व्यक्तिमा कोरोना भाइरसको संक्रमण देखिएको हो ।
बिहीबार आयोजित पत्रकार सम्मेलनमा स्वास्थ्य तथा जनसंख्या मन्त्रालयका प्रवक्ता विकास देवकोटाले राष्ट्रिय जनस्वास्थ्य प्रयोगशालामा परीक्षणमा एक व्यक्तिमा कोरोना भाइरसको संक्रमण पोजेटिभ देखिएको जानकारी दिएका हुन् ।
योसँगै नेपालमा कोरोना संक्रमितको संख्या ६ पुगेको छ। यसअघि चीनबाट आएका एक व्यक्तिमा देखिएकोमा उनी निको भइ घर फर्केका छन् भने अन्य पाँच जना भने उपचारकका क्रममै छन् । यसैबीच, राष्ट्रिय जनस्वास्थ्य प्रयोगशालामा बिहीबारसम्म ११ सय ८४ परीक्षण भएका छन् । चीनबाट स्वास्थ्य सामग्री ल्याइएपछि अहिले सातै प्रदेशमा कोरोनाको परीक्षण सुरु भएको छ ।
