अरविन्द केजरीवालले लिए पद तथा गोपनियताको सपथ
आम आदमी पार्टीका विधायक तथा दलका नेता अरविन्द केजरीवालले आइतबार दिल्लीको ऐतिहासिक रामलीला मैदानमा पद तथा गोपनीयताको शपथ लिएका छन् । दिल्लीका उपराज्यपाल अनिल बैजलले विधायक केजरीवाललाई मुख्यमन्त्री पदमा सपथ खुवाएका हुन् ।यस्तै मनीष सिसोदिया, सत्येन्द्र जैन, गोपाल राय, कैलाश गहलोत, इमरान हुसेन र राजेन्द्र गौतमले मन्त्रीको सपथ लिएका छन् ।
शपथ ग्रहण समारोहमा दिल्लीका उच्च पदस्थ व्यक्तिहरूसँगै ठूलो संख्यामा आम आदमी पार्टीका नेता, कार्यकर्ता र नागरिकको बाक्लो उपस्थिति थियो । सपथ ग्रहण समारोहका प्रधानन्त्री नरेन्द्र मोदीलाई निम्तो दिएपनि उनी भने उपस्थित भएनन् । विधानसभा चुनावमा विजयी आम आदमी पार्टीले दिल्लीमा तेस्रो पटक सरकार गठन गरेको छ । केजरीवाल तेस्रो पटक राज्यका मुख्यमन्त्री बनेका छन् ।
सन् २०१३ मा केजरीवाल पहिलो पटक मुख्यमन्त्री बनेका थिए । सन् २०१५ मा उनी दोस्रो कार्यकालका लागि मुख्यमन्त्री बनेका थिए । केही दिन अघि सम्पन्न विधानसभा चुनावमा आम आदमीले दिल्लीका ७० सिटमध्ये ६२ स्थानमा जित हासिल गरेको थियो । सन् २०१५ मा उक्त पार्टीले ७० मध्ये ६७ सिट जितेको थियो ।
